Tímamótasamþykktir um húsnæðismál

Tímamótasamþykktir voru gerðar í borgarráði í dag um húsnæðismál í borginni. Hæst ber samþykkt húsnæðisstefu til næstu 10 ára. Hún var mótuð af þverpólitískum starfshópi undir forystu Bjarkar Vilhelmsdóttur borgarfulltrúa. Tillögur hópsins fengu mjög góðar undirtektir allra umsagnaraðila.

Líklega er fátt brýnna í pólitík dagsins en að taka á húsnæðismálum til framtíðar, auka fjölbreyttni á húsnæðismarkaði og vinna að því að ungt fólk eigi fleiri valkosti en skuldsetningu vegna íbúðarkaupa. Húsnæðisstefnan er svar við þessu.

500 nýjar íbúðir fyrir ungt fólk

Ekki skiptir þó minna máli að við létum ekki nægja að samþykkja stefnuna heldur tókum fimm stórar ákvarðanir til að hrinda henni strax í framkvæmd. Í fyrsta lagi veitti borgarráð vilyrði um lóð fyrir stúdentagarða Félagsstofnun stúdenta (FS) við Brautarholt 7 (allt að 100 íbúðir). Þá var ákveðið að fara í viðræður við HR um að hefja undirbúning að byggingu stúdentagarða á svæði þeirra í Vatnsmýri. Í þriðja lagi mun skipulagsráð kanna frekari uppbyggingarmöguleika fyrir námsmannaíbúður á tveimur svæðum í samvinnu við HÍ og FS. Þessar þrjár samþykktir þýða að við gætum séð um og yfir 500 nýjar námsmannaíbúðir rísa á næstu árum! Í þeirri tölu eru 280 íbúðir sem hafin verður bygging á við svæði Vísindagarða HÍ í Vatnsmýri nú í desember. 

Reykjavíkurborg verði kjölfesta í uppbyggingu langtímaleigumarkaðar

Borgarráð samþykkti einnig að gera úttekt á Félagsbústöðum og meta möguleika þess að þeir verði undirstaða fasteignafélags sem myndi þjóna öllu höfuðborgarsvæðinu. Síðast en ekki síst verður ráðist í úttekt á bestu leiðum til að Reykjavíkurborg verði kjölfesta í uppbyggingu langtíma leigumarkaðar í borginni.  

Húsnæðisstefna Reykjavíkurborgar til 2020

Stefna Reykjavíkurborgar er að allir borgarbúar hafi öruggt húsnæði á viðráðanlegu verði, hvort sem fólk þarfnast stuðnings með sín húsnæðismál eða ekki. Húsnæðisstefna Reykjavíkurborgar nær þannig utan um húsnæðisþarfir allra borgarbúa, óháð eignarformi, stærð og gæðum húsnæðis. Borgarbúar þurfa að geta eignast og/eða leigt húsnæði eftir þörfum hverju sinni. Fjölbreytt framboð þarf að vera í boði í hverju hverfi.

Til að ná fram þessu markmiði er mikilvægt:

• Að Reykjavíkurborg stuðli að fjölgun leiguíbúða og búseturéttaríbúða, hvort sem er í eigu húsnæðissamvinnufélaga, félagasamtaka og/eða einkaaðila, einkum á miðlægum svæðum sem auðvelt er að þjóna með almenningssamgöngum.
• Að Reykjavíkurborg stuðli að húsnæðisframboði í samræmi við þarfir hverju sinni. Á næstu árum þurfi að auka framboð af smærri íbúðum, burtséð frá eignarformi, til að auka val og möguleika ungs fólks og þeirra sem ekki vilja eða geta lagt mikið eigið fé í húsnæði.
• Að kortleggja möguleikana á því að Reykjavíkurborg komi að uppbyggingu langtímaleigumarkaðar.
• Að stuðningur Reykjavíkurborgar eigi að vera bundinn persónulegum aðstæðum íbúa en ekki tengdur ákveðnum íbúðum, enda stuðlar það að félagslegum fjölbreytileika í hverfum borgarinnar.
• Að endurskoða reglur um sérstakar húsaleigubætur þannig að þær komi í veg fyrir óhóflega greiðslubyrði tekjulágs fólks með félagslegan vanda af húsnæði, óháð því hver á og/eða rekur íbúðina.
• Að Reykjavíkurborg taki undir nýja húsnæðisstefnu sem Velferðarráðuneytið kynnti í apríl 2011 þar sem meginreglan er sú að almennur húsnæðisstuðningur greiðist af ríkinu en sértækur stuðningur verði á vegum sveitarfélaganna.
• Að höfuðborgarsvæðið sé eitt búsetusvæði.

Flokkað undir Pistlar.