Það þarf nýja hugsun í Ráðhúsið. Borgin verður að vakna, taka forystu og beita öllu afli til að skapa störf og fjölga tækifærum. Kjarninn í hinni nýju hugsun er að Reykjavíkurborg þarf að beita sér og kveikja von til að koma Íslandi út úr kreppunni.

Borgin býr yfir sterkum innviðum og miklum mannauði en hlutverk hennar þarf að endurhugsa, eins og svo margt annað, eftir hrun. Það hefur Samfylkingin gert og kynnir aðgerðir á öllum lykilsviðum með megináherslu á atvinnumál, jöfn tækifæri og öruggt umhverfi barna.

Samfylkingin vill binda endi á aðgerðaleysið og hrinda markvissum og mikilvægum aðgerðum í framkvæmd í atvinnumálunum:

1. Tvöföldun viðhalds og auknar verklegar framkvæmdir
2. Endurnýjun í eldri hverfum og efling innviða
3. Samstillt vaxtarátak á öllu höfuðborgarsvæðinu
4. Átak í nýsköpun og nýtingu á tómu húsnæði
5. Vaxtarátak í græna geiranum

Samfylkingin vill aukið samstarf á höfuðborgarsvæðinu sem er eitt búsetu- og atvinnusvæði til að tryggja heildaryfirsýn og koma í veg fyrir kostnaðarsamt lóðakapphlaup og sóun á fjármunum útsvarsgreiðenda. Vítin eru til að varast þau.

Samfylkingin vill tryggja öllum börnum örugga þjónustu, standa vörð um grunn- og leikskóla og tryggja ódýrari frístundir fyrir öll börn, óháð efnahag. Að öðrum kosti er veruleg hætta á að hópar fólks, heilu kynslóðirnar beri varanlegan skaða af efnahagskreppunni.

Samfylkingin hafnar öllum hugmyndum um einkavæðingu Orkuveitunnar og leggur áherslu á að unnið verði á skuldavanda fyrirtækisins án tafar en skuldirnar hafa fjórfaldast á kjörtímabilinu sem er að ljúka.

Borgarmálin hafa verið í kreppu allt kjörtímabilið. Það er lykilatriði að endurvekja traust á borgarstjórn. Það verður aðeins gert með markvissum umbótum.

Auk ofangreindra áhersluatriða leggur Samfylkingin fram heildstæða stefnuskrá í öllum málaflokkum sem byggir á ítarlegri stefnumótun og samráði við á annað þúsund Reykjavíkinga og Samfylkingarfólk í vetur. Hægt er nálgast alla málaflokka á heimasíðunni undir Málefni.

Samfylkingin ætlar að:

Styðja við starf íbúasamtaka og efla hverfisráð sem umsagnar- og samráðsaðila í öllu sem lýtur að málefnum hverfisins. Fundir hverfisráða verði öllum opnum.

Fella múra milli stofnanna og ná fram hagræðingu og markvissari þjónustu með flutningi verkefna til þjónustumiðstöðva.

Koma á frístundastrætó í hverju hverfi til að minnka skutl og auka strætónotkun barna og ungmenna.

Endurskoða fyrirkomulag sérfræðiþjónustu við börn í samstarfi við ríkið. Börnin eiga að vera í brennidepli, ekki þær allt of mörgu stofnanir sem koma að velferð þeirra.

Styðja við hverfablöð sem upplýsinga- og samskiptatorg í öllum hverfum.

Opna leiðir fyrir íbúa sem vilja hafa áhrif á umhverfi sitt, s.s. leiksvæði, taka opin svæði í fóstur, skipuleggja hlaupabrautir, hjólaleiðir, matjurtagarða og aðstöðu til frístunda fyrir unga sem eldri.

Mæta þörfum 16-24 ára ungmenna í hverju hverfi með samstarfi grunnskóla, framhaldsskóla, ÍTR og vinnumálastofnunar.

Tryggja þarf sýnilega löggæslu í hverfunum og samstarf lögreglu, barnaverndar og skóla.

Stuðla að því að öll hverfi geti boðið upp á fjölbreytt úrval íþrótta og tómstunda. Hér má virkja félagsauð hverfanna með nýjum leiðum.

Stuðla að jöfnu aðgengi allra barna að menningarstarfi óháð búsetu. Allir skólar móti menningarstefnu með aðkomu listafólks.

Fara í sérstakt átak um endurnýjun eldri hverfa og verslunarkjarna. Byrjað verði í Fellahverfi.

Stuðla að því að núverandi félagsmiðstöðvar fyrir eldri borgara verði einnig nýttar fyrir atvinnulausa, foreldramorgna og ýmis félagasamtök í hverfinu.

Skilgreina grunnskóla sem almannatorg og að þeir nýtist öllum aldurshópum í hverfunum.

Efla þjónustumiðstöðvar í því hlutverki að sinna ráðgjöf við innflytjendur í hverju hverfi.

Efla foreldrarölt og nágrannavörslu í samráði við íbúa í hverju hverfi.

Efla samstarf við háskóla um afmörkuð uppbyggingarverkefni í hverfum.

Uppstokkun og endurmat

Eftir hrun bankanna og þau ótrúlegu vinnubrögð sem birst hafa borgarbúum á kjörtímabilinu þarf borgarstjórn að leggja áherslu á að endurheimta traust.

Undirstrika þarf gegnsæi og góða meðferð almannafjár í öllum rekstri Reykjavíkurborgar.

Forgangsraðað verði í þágu þjónustu við íbúa.

Stofnað verði embætti Umboðsmanns borgarbúa til að leiðbeina íbúum og veita þeim ráðgjöf um rétt sinn.

Fækka þarf nefndum og einfalda hið pólitíska stjórnkerfi. Sambærileg endurskoðun fari fram á stjórnsýslunni. Skerpt verði á verkaskiptingu milli stjórnmálamanna og embættismanna.

Öll störf hjá Reykjavíkurborg verði auglýst og ráðningar ákveðnar á faglegum forsendum.

Stuðla að starfsánægju starfsfólks og styðja það í störfum þeirra.

Hert verði á reglum um útboð og innkaup með það að markmiði að hagræða, auka samkeppni og jafnræði.

• Dæmi. Herða þarf sérstaklega kröfur sem sporna gegn kennitöluflakki.

Í siðareglur borgarstjórnar komi ákvæði um birtingu skulda og skuldbindinga kjörinna fulltrúa, ekki síður en eigna þeirra.

Sett verði á stofn siðanefnd á vegum Sambands íslenskra sveitarfélaga til að úrskurða í álitamálum og þegar grunur vaknar um brot á siðareglum.

Íbúalýðræði og aðgengilegur borgarstjóri

Samfylkingin vill efla íbúalýðræði. Með því að greiða götur íbúanna að ákvörðunum er viðurkenndur réttur einstaklinga til upplýsinga og þátttöku við að móta nánasta umhverfi sitt.

Fjölga á beinum atkvæðagreiðslum um meginmál og setja um framkvæmd þeirra skýrari ramma.

Samráð í skipulags-, umhverfis- og skólamálum á að gera markvissara og styrkja aðkomu íbúa og foreldra að lykilákvörðunum.

Flytja þarf aukin verkefni og fjárráð til hverfaráða.

Opnuð verði lifandi lýðræðis- og ábendingagátt á vef Reykjavíkurborgar.

Dagbók borgarstjóra á að vera opinber.

Opna hverfafundi borgarstjóra á að endurvekja.

Opin stjórnsýsla

Upplýsingar um borgarreksturinn eiga að vera öllum aðgengilegar til að skapa traust, eðlilegt aðhald og eftirlit.

Réttur til aðgangs að upplýsingum verði styrktur með endurskoðun á upplýsingastefnu Reykjavíkurborgar.

Hagtölur Reykjavíkur á að gefa út á netinu með helstu kennitölum úr rekstri borgarinnar, efnahagsumhverfi og atvinnulífi Reykjavíkur.

Sameining sveitarfélaga og aukið sjálfstæði hverfanna

Samfylkingin vill markvissari og nánari samvinnu og sameiningu sveitarfélaga á höfuðborgarsvæðinu. Jafnframt verði sjálfstæði hverfa í ákvörðunum, þjónustu og rekstri aukið.

Reykjavík taki forystu í umræðum um nánari samvinnu og sameiningu sveitarfélaga á höfuðborgarsvæðinu.

Stefnt verði að því að styrkja og einfalda stjórn á sameiginlegum verkefnum á sviði skipulagsmála, samgöngu- og umhverfismála og sameiginlegra verkefna byggðasamlaga.

Staða svæðisskipulags höfuðborgarsvæðisins verði styrkt og jafnframt unnið nýtt svæðisskipulag sem nái frá Reykjanesi í vestri, Árborgarsvæðinu í austri og Borgarnesi í norðri. Jafnframt verði sett fram sameiginleg sýn á umhverfis-, atvinnu- og húsnæðismál á öllu svæðinu.

Útfærðar verði tillögur í samráði við íbúa og starfsfólk með það markmið að draga úr miðstýringu og auka sjálfstæði hverfa með eflingu hverfaráða, hverfatengdrar þjónustu og forgangsröðun í rekstri innan hverfisins.

Traust fjármálastjórn – öruggari rekstur

Ábyrg og traust fjármálastjórn er forsenda þess að unnt sé að ná settum markmiðum. Þá kröfu verður að gera til áætlana að þær standist.

Unnin verði áætlun um efnahag- og fjármálastjórn Reykjavíkurborgar til fimm ára. Samhliða gerð hennar verði unnar fjármálareglur, stefna um áhættu- og lánastýringu þar sem fjárhagslegt eftirlit verði styrkt í ljósi reynslunnar. Áætlunin og stefnan nái jafnt til borgarsjóðs og fyrirtækja borgarinnar.

Undirbúningur fjárhagsáætlunar Reykjavíkurborgar verði stokkuð upp og stefnumótun einstakra málaflokka gefið aukið vægi og aðkoma íbúa og hagsmunaaðila gerð gegnsærri.

Fyrirtæki borgarinnar- eftirlit og eigendastefna

Reynslan kennir að skýra verður verka- og ábyrgðarskiptingu milli stjórna fyrirtækja í eigu sveitarfélaga og helstu stjórnenda þeirra. Jafnframt þarf að skilgreina aðkomu sveitarstjórna að stefnumótun og eftirliti með starfsemi og rekstri fyrirtækjanna.

Eigendastefna verði skilgreind fyrir fyrirtæki og byggðasamlög í eigu borgarinnar.

Aðkoma kjörinna fulltrúa að stefnumótandi ákvörðunum í rekstri byggðasamlaga og fyrirtækja borgarinnar verði tryggð, óháð setu þeirra í stjórnum þeirra.

Tryggja þarf að stefna Reykjavíkurborgar nái fram að ganga í samræmi við eignahluti borgarinnar í byggðasamlögum og fyrirtækjum borgarinnar að teknu eðlilegu tilliti til hagsmuna og sjónarmiða minnihlutaeigenda.

Innra eftirlit á að veita virkt aðhald í borgarkerfinu og reglubundið árangursmat á að vera ófrávíkjanleg regla í öllum rekstri.

Góð og skilvirk þjónusta

Byggðar verði upp þrjár megingáttir almennrar þjónustu Reykjavíkurborgar þar sem markmiðið er einfalt aðgengi að allri þjónustu á einum stað: á þjónustumiðstöðvum í hverfum, í sameiginlegu símaveri og á vefnum Rafrænu Reykjavík.

Lokið verði við að setja stofnunum og fyrirtækjum borgarinnar þjónustumarkmið þar sem þær væntingar og kröfur sem borgarbúar geta gert til borgarinnar koma fram.

Jafnframt verða markmið þjónustunnar og tímafrestir skilgreindir.

Þjónustumarkmið fela í sér að Reykvíkingar eigi rétt á faglegri þjónustu, skilvirkni og góðri nýtingu fjármuna.

Borgin á að taka upp stöðugt árangursmat þjónustu á sem flestum sviðum og vinna að því að innleiða vottuð gæðakerfi þar sem við á.

Í miklu atvinnuleysi og efnahagsþrengingum eykst hættan á félagslegri mismunun. Innflytjendur eiga á hættu að vera á jaðri samfélagsins, fólk með fötlun á undir högg að sækja á vinnumarkaði og huga ber að ólíkri stöðu kynjanna í þróun atvinnuleysis. Stéttskipting birtist okkur í gegnum menningar-, íþrótta- og frístundaþátttöku barna og unglinga. Samfylkingin vill jafnt aðgengi allra að menningu og þjónustu borgarinnar.

Forysta borgarinnar í mannréttinda- og menningarmálum verður að vera ótvíræð. Í Reykjavík er fjölbreytileikinn mestur og atvinnuleysi mikið. Samfylkingin telur að mannréttindi, menning og jafnrétti séu samþætt allri tilveru borgarbúa og allri starfsemi borgarinnar; frá borgarskipulagi til skólastarfs. Mannréttindastefna borgarinnar á að vera leiðarljós í allri þjónustu borgarinnar.

Reykjavík er fjölmenningarsamfélag

Samfylkingin ætlar sér að marka skýra stefnu í þjónustu og ráðgjöf við innflytjendur.

Samfylkingin ætlar að:

endurskoða þjónustu- og ráðgjafarhlutverk borgarinnar í samráði við ríkið og önnur sveitarfélög.

stuðla að aukinni þátttöku barna og ungmenna af erlendum uppruna í frístundastarfi í samstarfi við íþróttafélög, skólahljómsveitir og listaskóla.

efla móðurmálskennslu barna af erlendum uppruna í samstarfi við grasrótarsamtök.

leita allra leiða til að fjármagn til íslenskukennslu barna af erlendum uppruna nýtist sem best og í þágu þeirra barna sem mest þurfa á henni að halda. Tryggja verður að fjármagn til íslenskukennslu sé nægilegt til að hún nái markmiðum sínum.

styðja við félög og hagsmunasamtök útlendinga og fela þeim ákveðið hlutverk í stefnumótun borgarinnar í málefnum innflytjenda.

Jafnrétti í verki

Reykjavíkurborg er stærsti vinnustaður landsins.

Samfylkingin ætlar að:

kanna árlega þróun kynbundins launamunar og bregðast við með áætlun sem hefur það að markmiði að honum verði útrýmt að fullu.

marka stefnu um jafnréttisfræðslu. Skólar verða að mæta þörfum bæði stráka og stelpna.

móta aðgerðaráætlun gegn ofbeldi. Tryggja að allt starfsfólk borgarinnar bregðist markvisst við þegar grunur leikur á um ofbeldi.

Mannréttindi og þjónusta sem næst fólki

Reykjavíkurborg tekur við málefnum fatlaðra frá árinu 2011 og málefnum aldraðra frá árinu 2012.

Samfylkingin ætlar að:

tryggja að þjónustan verði þróuð og unnin í samráði við notendur og starfsfólk.

styrkja þjónustumiðstöðvar í hverfum borgarinnar m.t.t. málefna fatlaðra og aldraðra.

móta stefnu um félagsstarf og aðra þjónustu við eldri borgara með það að markmiði að eldri borgarar hafi sjálfir um það að segja hvernig þjónustan er.

Menning fyrir alla

Menning og listir í Reykjavík eru mikilvægar fyrir sjálfsmynd borgarbúa, mannlífið, menntun barna og Reykjavík sem ferðamannastað. Menningarlíf á að einkennast af fjölbreytni og virkri þátttöku allra á öllum aldri. Fjölmenning er dýrmætur þáttur í menningu borgarinnar. Ekki skal einblína á efnahagslegan ávinning af menningarstarfsemi, menningin er í sjálfu sér bæði auður og uppspretta. Menningarstefna borgarinnar á að ná til allra hverfa og miða að samstarfi ólíkra aðila. Börn og unglingar hafa rétt á því að komast í kynni við menningu og listir. Starfsemi sjálfstætt starfandi listahópa er mikilvæg borgarmenningunni. Fjölmenning er dýrmætur þáttur í menningu borgarinnar.

Samfylkingin ætlar að:

stuðla að því að styrkir til menningarmála séu veittir með hliðsjón af nýsamþykktri menningarstefnu borgarinnar.

setja markmið um styrkveitingar fyrir hvert ár.

móta stefnu um framtíðarhlutverk Hörpunnar sem tónlistarhús fyrir alla.

stofna til ,,Menningarfána“. Skólar keppi að því markmiði að uppfylla skilyrði um menningarstarf, listsköpun, samstarf við listamenn og áherslu á fjölmenningu.

Gott borgarumhverfi einkennist af félagslegu réttlæti, skemmtilegu götulífi, góðum samgöngum, skjólsælum torgum, fallegum húsaröðum og görðum; góðu vatni, heilnæmu lofti,  góðu aðgengi að þjónustu og skjóli fyrir veðri og vindum.

Lélegt borgarumhverfi einkennist af skorti á þessu. Gott borgarumhverfi er eitt stærsta hagsmunamál borgarbúa. Gott borgarumhverfi gerir ekki upp á milli fólks.

Höfuðborgarsvæðið er sambýli

Höfuðborgarsvæðið er eitt atvinnu- og búsetusvæði og myndar eina skipulagsheild. Smákóngaveldið, þar sem öll áhersla er lögð á samkeppni sveitarfélaganna frekar en samvinnu og samráð, hefur reynst dýrkeypt. Skortur á samvinnu á einnig sinn þátt í því hve erfitt hefur reynst að halda uppi almenningssamgöngum á svæðinu. Breytinga er þörf.

Samfylkingin telur nauðsynlegt að svæðisskipulagið fái sterkari stöðu og tryggi ábyrgari þróun höfuðborgarsvæðisins. Svæðiskipulagsráð eða sameiginlegur vettvangur sveitarfélaganna þarf að hafa vald til að móta og stýra stefnu á sviði landnotkunar, byggðaþróunar, samgangna og umhverfismála.

Þorpin í borginni. Þjónustan í hverfunum

Skipulagið í borginni ætti að beina þjónustu inn í hverfin en ekki út  úr þeim. Hin mörgu og ólíku hverfi borgarinnar eiga að vera eins og þorp þar sem hægt er að sækja alla mikilvæga þjónustu: matvöruverslun, heilsugæslu, skóla, frístundaiðkun, afþreyingu og menningarviðburði. Þannig verður borgin notendavæn og vistvæn og þar með lífvænleg.

Matvöru- og smávöruverslun á ekki að beina í stórar verslunarskemmur við stofnbrautir í útjaðri byggðarinnar. Við teljum nauðsynlegt að móta heildræna stefnu í þjónustu og verslun þar sem lífsgæði íbúanna eru höfð að leiðarljósi. Nýleg dæmi úr borginni sanna að hægt er að reka lággjaldaverslanir með matvöru inni í hverfunum.

Réttur íbúanna og ábyrgð. Við eigum borgina saman

Skipulagsákvarðanir í borginni hafa bein áhrif á líf okkar og barnanna okkar. Það verður að vera hafið yfir allan vafa að almannahagsmunir ráði ávallt ferðinni en ekki sérhagsmunir fjárfesta og verktaka.

Réttur íbúanna á að vera skýr. Þeir eiga að geta leitað til hlutlauss sérfræðings, sér að kostnaðarlausu, sem skýrir út fyrir þeim tölur um byggingarmagn, hæðir, nýtingarhlutfall, skuggavarp og umferðaspár.

En íbúarnir eru líka ábyrgir fyrir borgarumhverfinu. Við leggjum áherslu á að borin sé virðing fyrir almenningsrými, götum, görðum, gangstéttum og torgum. Við eigum borgina saman.

Endurnýjun hverfa. Byrjum á Breiðholti

Borgir eru lífrænar. Borgarhverfi þurfa viðhald og endurnýjun með reglulegu millibili. Á meðan fasteignamarkaður og uppbygging er í lægð gefst kærkomið tækifæri að ljúka við gerð nýs aðalskipulags, gera langtímaáætlun  og vinna að viðhaldi og endurnýjun hverfanna.

Samfylkingin vill vinna markvisst að endurnýjun borgarhverfa. Setja skal fram þróunaráætlun á forsendum hvers hverfis fyrir sig. Endurnýjunin felur meðal annars í sér endurbætur á gangstéttum, götum, gatnamótum, torgum, görðum, göngustígum, leikvöllum, grænum svæðum, húsum, þjónustukjörnum. Efra-Breiðholt verður fyrst á dagskrá.

Samfylkingin mun beita sér fyrir endurnýjun úr sér genginna iðnaðar- og verslunarsvæða og þéttingu byggðarinnar þar sem það á við. Elliðavogs- og Höfðasvæðið býr yfir miklum tækifærum og getur gengið í endurnýjun lífdaga. Skipulagi Mýrargötusvæðisins og Gömlu hafnarinnar þarf að ljúka og þegar fasteignamarkaður kemst í eðlilegt horf má hefja uppbyggingu við Hlemm og á völdum svæðum í Vatnsmýri.

Mikilvægt er að við þéttingu og endurnýjun í gamalgrónum hverfum sé vandað til hönnunar og tekið tillit til umhverfisins. Samfylkingin vill vernda byggðamynstrið í miðborg Reykjavíkur. Ekki skal gengið á heildstæð græn svæði.

Við skipulag nýrra hverfa og endurnýjun gamalla hverfa er nauðsynlegt að skapa umgjörð fyrir félagslegan fjölbreytileika. Hlutur leiguíbúða skal vera minnst fimmtungur á nýjum byggðarsvæðum. Vinna skal að aðgengi fyrir alla, innan húss sem utan.

Tóm hús eru tómt rugl. Samfylkingin vill beita þá húseigendur dagsektum sem láta hús í grónum hverfum standa auð og grotna niður.

Borgargötur eiga að hafa fallegt yfirbragð. Samfelldar húsaraðir byggðar að gangstétt mynda skjól fyrir fótgangandi vegfarendur.

Vistvæn samgöngustefna í verki

Borgin setur sér vistvæna samgöngustefnu og hún ætlast til þess að fyrirtækin í borginni geri slíkt hið sama. Koma þarf upp hvatakerfi sem umbunar starfsmönnum fyrirtækja sem nota vistvænar samgöngur.

Strætó á 10 mínútna fresti. Strætisvagnar eiga að ganga á 10 mínútna fresti á álagstímum. Þeir ganga alla daga ársins.

Mikilvægt er að hanna og leggja göngustíga, gangstéttir og hjólabrautir af sama metnaði og vegir eru lagðir fyrir bíla.

Hjólreiðar eiga að vera hluti af umferðarflæðinu í gegnum borgarhverfin, milli þeirra og milli sveitarfélaga.

Samfylkingin vill að fleiri götum verði breytt í vistgötur, jafnvel göngugötur þar sem við á. Skoða þarf þann möguleika að breyta völdum stofnbrautum í breiðgötur með hægari umferð. Hraðbrautir eiga ekki heima í íbúahverfum.

Endurskoða þarf reglugerðir um fjölda bílastæða við íbúðarhús og fyrirtæki. Einnig þarf að endurskoða þá aðferð að láta umferðaspár alfarið ráða uppbyggingu gatnakerfisins.

Umferðin og gatnakerfið á að vera á forsendum borgarinnar en ekki öfugt. Endurhugsa þarf hið flokkaða gatnakerfi og laga það að blandaðri borgarbyggð.

Fótgangandi vegfarendur eiga að hafa forgang í umferðinni í miðbænum.

Lítum okkur nær

Landslagið og náttúran umhverfis höfuðborgarsvæðið er eitt helsta ríkidæmi okkar sem búum hér. Fiskivötn, tærar ár, lækir, grænir dalir, hraun, eldfjöll, háhitasvæði, heiðar, blár fjallahringur, ósnortnar strendur. Þetta er sannkallað ævintýraland. Við viljum vekja íbúana til meiri vitundar um þennan auð og gera þetta land aðgengilegra. Þetta er sameiginlegt verkefni sveitstjórnarmanna á höfuðborgarsvæðinu.

Samfylkingin í Reykjavík vill:

Að lagður verði samfelldur göngu- og hjólastígur með ströndinni frá Seltjarnarnesi og suður fyrir Hafnarfjörð.

Vernda ströndina þar sem hún er ósnortin og græna trefilinn umhverfis höfuðborgarsvæðið.

Byggja upp aðgengilegri útvistarsvæði í nágrenni borgarinnar.

Að grænu svæðin innan borgarmarkanna verði betur nýtt, þeim verði betur sinnt og  þar með líflegri. Tryggja ætti öllum aðgengi að grænum svæðum.

Vatnsmýrin verður byggð en það tekur tíma

Stærstu fyrirtæki og stofnanir borgarinnar, háskólar og Landsspítali, eru í uppbyggingu við Vatnsmýrina. Þar starfa nú og læra um það bil 20 þúsund manns. Þetta felur í sér mikið tækifæri fyrir Reykjavík eins og önnur byggð á svæðinu. Sú uppbygging mun hins vegar þróast yfir lengri tíma. Samfylkingin styður eindregið að skipulag byggðar í Vatnsmýri taki mið af vinningstillögunni frá 2008. Þar er gert ráð fyrir að flugvöllurinn fari. Í ljósi þeirra úrlausnarefna sem útþenslan í útjaðri byggðarinnar skilur eftir sig er þó ljóst að flugvöllurinn er ekki á förum á komandi kjörtímabili.

Umhverfismál snúast bæði um réttindi og skyldur. Rétt okkar til að búa í heilbrigðu umhverfi og njóta þeirra lífsgæða sem nútíminn hefur upp á að bjóða en einnig þær skyldur okkar að ganga vel um umhverfi okkar sem við höfum fengið að láni og skila því í jafn góðu eða betra ástandi til næstu kynslóðar. Umhverfismál krefjast samvinnu, ekki bara yfir hreppamörk heldur yfir höf og álfur.

Reykjavíkurborg hefur möguleika á að vera í hópi grænustu höfuðborga heims en til þess þarf samstillt átak margra aðila. Samfylkingin í Reykjavík ætlar að:

skapa betri borgarbrag og draga úr þörf fyrir sífellt stærri og dýrari umferðarmannvirki með betra borgarskipulagi, betri almenningssamgöngum og bættri aðstöðu fyrir gangandi og hjólandi vegfarendur.

að orkukerfi samgangna verði endurhugsað til að skapa sem mestan heildrænan ávinning fyrir samfélag og umhverfi.

setja skilgreind og tímasett markmið um samdrátt í losun gróðurhúsalofttegunda í Reykjavík.

setja sér markmið um að innan áratugar verði annað hvert ökutæki í borginni knúið visthæfum innlendum orkugjöfum. Til að ná þessu markmiði verði efnt til samstarfs við framkvæmda- og löggjafavaldið, nágrannasveitarfélög og áhugasömum aðilum, innlendum sem erlendum, boðið samstarf um að ná settu marki.

fara í markvissar aðgerðir til að draga úr umferðarhættu, svifryks- og hávaðamengun í borginni.

gera strætó að raunverulegum valkosti við einkabílinn en til þess þarf að auka tíðni á álagstímum, tryggja að strætó gangi alla daga ársins og að leiðarkerfið nýtist börnum til að komast til og frá frístundum.

að notendaráð starfi með virkum hætti og leiðbeini stjórn Strætó Bs. um þjónustu. Sérstaklega skal horft til þess að Reykjavíkurráð ungmenna geti haft áhrif á leiðakerfi strætó.

bæta flæði hjólandi umferðar innan borgarinnar og hvetja fyrirtæki í borginni til að bæta aðstöðu fyrir hjólreiðafólk á vinnustað og að láta það njóta sömu hlunninda og þeir sem mæta á bíl, í anda hugmyndafræði um jafnræði samgöngumáta.

gera borgarbúum auðveldara að flokka sorp og koma því til skila. Reykjavíkurborg á að tryggja gæði sorphirðunnar en nýta sér þá samkeppni sem fyrir hendi er um frágang og nýtingu á þeim verðmætum sem vel flokkað sorp skilar.

gera heildstæða úttekt á grænum svæðum borgarinnar og marka þeim vernd á grunni hennar. Of lengi hefur viðgengist að kroppað sé úr þessum svæðum til mannvirkjagerðar og tími til kominn að ákveða framtíð þeirra út frá gildi þeirra sem útivistarsvæða fyrir almenning í stað þess að líta á þau sem einskismannsland.

auka áherslu á útikennslu og náttúruskóla fyrir börn og tryggja að öll skólahverfi eigi möguleika á nálægð við grænt náttúrusvæði með aðstöðu fyrir slíka fræðslu.

endurhanna opin leiksvæði, græna reiti og vannýtta rólóvelli víða um borgina þannig að þar verði eitthvað spennandi við að vera fyrir alla fjölskylduna.

gera samkomulag við öll sveitarfélög sem land eiga að náttúrusvæðum á Reykjanesskaganum um vernd og aðra nýtingu þessara svæða t.d. í anda hugmynda um eldfjallagarð og fjölbreytt útivistarsvæði. Ljóst er að gildi þessara svæða fyrir útivist og ferðamennsku er þegar mikið og á aðeins eftir að aukast á næstu áratugum. Mikill skaði væri að fórna slíkum verðmætum fyrir þrönga skammtímahagsmuni.

Samfylkingin vill gera einkunnarorð þjóðfundar um menntamál að leiðarljósi reykvískra skóla: ,,Virðing, gleði og sköpun“. Grunnstef jafnaðarstefnunnar segir að skólar eigi að vera fyrir öll börn, óháð atgervi og efnahag. Góður skóli er sá sem ræktar styrkleika hvers barns svo það megi njóta sín til fulls. Frístundastarf, menningarfræðsla og íþróttir eru mikilvægur hluti af námi barna, þroskar þau og eflir. Við þröngan fjárhag borgarinnar  verður að forgangsraða til barna og ungmenna. Þannig vill Samfylkingin forgangsraða.

Sterkari skóli, innihaldsríkur skóladagur og samstarf sem flestra. Stefna Samfylkingarinnar er:

að stórauka samstarf allra þeirra sem koma að menntun, umönnun og uppeldi barna og ungmenna. Færa skal þjónustu út í hverfin, til barnanna og foreldranna.

að stytta vinnudag barna með samþættingu frístunda- og skólastarfs og stuðla þannig að fleiri samverustundum fjölskyldna.

að minnka skutlið með ,,frístundastrætó“ í öllum hverfum.

að íbúar á hverjum stað hafi áhrif á þróun samstarfs frístundaheimila og skóla.

að listnám verði í boði á skólatíma og í skólahúsnæði og leitað allra leiða til að sem flest börn geti notið listkennslu.

að byggja upp öfluga skólaráðgjöf í hverfunum, sem næst börnunum.

Gagnrýnin hugsun skapar sterkara samfélag. Stefna Samfylkingarinnar er:

að auka vægi siðfræði, heimspeki, tjáningar og samvinnu í námi barna í leik- og grunnskólum sem og frístundaheimilum.

að menntastefna landsins speglist í reykvískum leik- og grunnskólum: læsi í víðum skilningi þess orðs, mannréttindi og lýðræði, jafnrétti, menntun til sjálfbærni og skapandi hugsun.

að allt starf með börnum og unglingum í Reykjavík taki mið af mannréttindastefnu Reykjavíkurborgar.

Aðgengi barna og unglinga að menningu og listsköpun. Stefna Samfylkingarinnar er:

að leik- og grunnskólar og frístundaheimili móti sér menningarstefnu og geri áætlun um samstarf við listamenn og menningarstofnanir.

að skólar geti keppt um ,,menningarfána“, samanber Grænfána í umhverfismennt. Skólar fengju þá viðurkenningu sem skara fram úr í menningar- og listfræðslu og eru í virku samstarfi við listamenn og menningarstofnanir. Fánum gæti fjölgað eftir áherslum í skólasamfélaginu hverju sinni (Tæknifáninn, Heilsufáninn).

Ódýrari frístundir og jafnt aðgengi. Stefna Samfylkingarinnar er:

að forvarnar, frístunda- og félagsstarf séu hluti af menntun barna og unglinga.

að allir sem vilja geti stundað íþróttir ánægjunnar og heilsunnar vegna og að áfram verði stutt við afreksíþróttir.

að fara í viðræður við íþróttafélög, æskulýðsfélög og listaskóla um að skipulagt frístundastarf barna og unglinga verði ódýrara og aðgengilegra.

að öllum börnum bjóðist áfram hollar og ódýrar skólamáltíðir.

að auka samráð við börn og ungmenni um hvað eina sem lýtur að þeirra daglega lífi, frístundaframboð, námsaðferðir og mótun skólanámskrár.

leita allra leiða til að fjármagn til íslenskukennslu barna af erlendum uppruna nýtist sem best og í þágu þeirra barna sem mest þurfa á henni að halda. Tryggja verður að fjármagn til íslenskukennslu sé nægilegt til að hún nái markmiðum sínum.

að sá möguleiki verði fyrir hendi að hægt verði að auka verðgildi frístundakortsins vegna barna sem þurfa sérstakan stuðning. Einnig að aðstandendur barna geti aukið verðgildi frístundakortsins með framlögum.

að við uppbyggingu íþróttaaðstöðu verði einkum horft til þeirra hverfa þar sem lítil aðstaða er í boði, t.d. Grafarholts, Norðlingaholts og Úlfarsárdals.

Samstarf heimila og skóla. Við eigum börnin saman. Stefna Samfylkingarinnar er:

að leiða róttæka hugarfarsbreytingu um að skólinn og samfélagið séu eitt, og að þátttaka allra foreldra í skólastarfi verði raunverulegt hreyfiafl. Fyrir foreldra af erlendum uppruna er túlkaþjónusta mikilvæg svo þátttaka þeirra sé möguleg.

að foreldrum verði gert kleift að láta skoðun sína í ljós á skóla barna sinna með árlegum rafrænum skoðanakönnunum fyrir hvern skóla.

Faglegt starf og samstarf við fræðsluaðila og stofnanir. Stefna Samfylkingarinnar er:

að fara í samstarf innan borgarinnar um kennara- og skólastjóraskipti til að stuðla að útbreiðslu þekkingar, meira samstarfi og starfsþróun.  Skólastjórar verði ráðnir til ákveðins árafjölda í senn en heimilt verði að endurnýja samninga að þeim tíma liðnum.

að styðja við nýbreytni- og þróunarstarf í leik- og grunnskólum og í frístundastarfi.

að styrkja fræðsluhlutverk húsdýragarðsins og leita leiða til að Náttúruskólinn mæti sívaxandi eftirspurn. Hvetja skal til þess að stofnanir borgar og ríkis þrói sambærilegar kynningar- og fræðsludeildir og Rafheimar Orkuveitu Reykjavíkur.

Unga fólkið, brotthvarf og atvinnuleysi. Stefna Samfylkingarinnar er:

að taka upp viðræður við Mennta- og menningarmálaráðuneytið um að Reykjavíkurborg reki tilraunaskóla fyrir 13-18 ára nemendur.

að rjúfa einangrun og óvirkni ungra atvinnuleitenda með samstarfi ríkis og borgar, stéttarfélaga, símenntunarmiðstöðva, ÍTR, grunn- og framhaldsskóla.

að náms- og starfsráðgjöf í grunnskólum verði efld eins og kostur er.

að borgin tryggi sumarstörf eða tómstundastarf fyrir ungmenni yfir sumartímann eftir föngum. Sérstaklega þarf að beina sjónum að 17 ára gömlum Reykvíkingum. Mikilvægt er að virkja frumkvæði ungmenna í því samhengi og mætti horfa til starfsemi Austurbæjarbíós sumarið 2009 í því samhengi.

Samfylkingin vill ýta undir virka þátttöku allra. Þátttaka er mannréttindi. Við tryggjum öllum tækifæri. Samfylkingin hafnar fátækt og félagslegri mismunum einstaklinga og hópa.

Ójöfnuður leiðir til sundrungar en jöfnuður skapar stöðugleika. Reykjavík á að verða borg sanngirni.

Þjónusta í hverfinu þínu

Velferðar- og sérfræðiþjónusta á að snúa jafnt að öllum, ungum sem öldnum, í hverfum borgarinnar.

Þverfagleg vinnubrögð og samþætting bætir grunnþjónustu og eykur hagkvæmni.

Samfylkingin vill:

Efla þjónustumiðstöðvar þannig að öll nærþjónusta verði á einum stað og að hún verði kynnt íbúum.

Að samþætt heimaþjónusta og heimahjúkrun verði hverfisbundin.

Að almennu barnaverndarstarfi verði sinnt á þjónustumiðstöðvum.

Að sýnileg löggæsla vinni með barnavernd og þjónustumiðstöðvum í öllum hverfum.

Börn og unga fólkið í forgang

Efst á forgangslista eru  börnin okkar. Reynslan hefur jafnframt sýnt að það er úrslitaatriði í kreppu að virkja ungt fólk 18 – 25 ára sem er án atvinnu og ekki í námi.

Fátækt í æsku og á unglingsárum rænir fólk framtíðinni.

Samfylkingin vill:

Bjóða öllum börnum morgunverð og  hollan hádegismat í skólum og leikskólum á viðráðanlegu verði.

Taka upp viðræður við íþróttafélög, listaskóla og æskulýðsfélög um ódýrari frístundir. Fyrir vikið verði tómstundatilboð þannig að þau nýtist öllum sem vilja.

Að frístundakort barna verði opnað til að hægt sé að bæta inn á það greiðslum.

Dæmi. Foreldrar sem fá fjárhagsaðstoð fá greiðslur inn á frístundakortið til að tryggja möguleika barna þeirra á tómstundum.Einnig að t.d. amma og afi geti greitt inn á kortið.

Leggja áherslu á að fyrstu tvö ár framhaldsskólans verði skólaskylda og að fjölbreytni náms verði aukin með áherslu á iðn- og verknám.

Rjúfa einangrun og óvirkni ungra atvinnuleitenda með öllum ráðum undir forystu þjónustumiðstöðva í hverfum.

Tryggjum að allir hafa í sig og á

Allir eiga að hafa trygga framfærslu og sveitarfélagið á að veita það öryggi. Samfylkingin sættir sig ekki við fátækt sem ríkir í samfélaginu í dag.

Samfylkingin vill:

Að gjaldskrár borgarinnar hækki ekki umfram verðlagsbreytingar.

Lágtekjumörk skv. skilgreiningu ESB og Hagstofunnar eru 160.800 kr. á mánuði. Samfylkin telur að enginn eigi að hafa úr minna að spila. Þetta þýðir að grunnframfærsla gegnum fjárhagsaðstoð og sérstakar húsaleigubætur þarf að hækka.

Dæmi. Lágtekjumark fyrir einstakling er nú 160.800 kr.[1] á mánuði í ráðstöfunartekjur. Einstaklingur með fjárhagsaðstoð fær 125.500 og 18.000 kr. í húsaleigubætur. Hann vantar 17.300 kr. á mánuði til að komast yfir lágtekjumarkið. Reykjavíkurborg á að tryggja þessa viðbót.

Að framfærsla barna verði tryggð með barnabótum og öðrum barnatengdum greiðslum.

Að fjárhagsaðstoð sé ekki langtímaúrræði. Öllum sem hafa verið á framfærslu í meira en 3 mánuði verði boðið upp á ráðgjöf, námskeið og úrræði sem tryggir virkni þeirra.

Reykjavíkurborg leiti eftir auknu samstarfi við Vinnumálastofnun vegna aðstæðna þeirra sem eru utan vinnumarkaðar.

Eitt samfélag fyrir alla

Reykjavíkurborg á að þjóna öllum, óháð aðstæðum. Þjónustan á að vera á einni hendi.

Samfylkingin styður því eindregið flutning þjónustu fatlaðra og aldraðra frá ríki til sveitarfélaga. Reykjavíkurborg á að hafa forgöngu um þróun þjónustunnar á sveitarstjórnarstigi.

Samfylkingin vill:

Að öll þjónusta sé unnin í samstarfi við notendur.

Notendastýrð þjónusta verði þróuð samhliða yfirflutningi eins og fatlaðir hafa haft forgöngu um.

Mótuð verði þjónustustefna eldri borgara í Reykjavík með eldri borgurum

Vinna markvisst í samvinnu við fólk, félög og stofnanir í hverfum að því að rjúfa félagslega einangrun, sérstaklega aldraðra.

Starfrækja félagsmiðstöðvar út í hverfum sem skulu starfa eftir þörfum hverfisbúa og notenda.

Dæmi. Opna félagsmiðstöðvar og þær listasmiðjur sem þar eru, og eru nú að mestu sóttar af eldri borgurum, fyrir foreldra með ungabörn og atvinnuleitendur. Myndi það skapa meira líf og fjölbreyttari starfsemi þar sem kynslóðabilið og „skipting borgarbúa í hópa“ myndi minnka.

Tryggja öryggi og velferð innflytjenda þar sem hætta er á félagslegri mismunun á tímum atvinnuleysis og annarra þrenginga.

Öruggir valkostir í húsnæðismálum

Allir eiga að hafa val á öruggu húsnæði í samræmi við þarfir og fjárhag.

Samfylkingin vill:

Að höfuðborgin bjóði upp á öflugan leigumarkað og búseturétt.

Að Reykjavíkurborg stuðli að vexti og viðgangi húsnæðissamvinnufélaga, leigu- og búsetusamtaka í almannaþágu.

Að skoðað verði hvort Félagsbústaðir verði hluti af stærra húsnæðissamvinnu- og búseturéttarfélagi á öllu höfuðborgarsvæðinu.

Að íbúar í húsnæði á vegum borgarinnar hafi tækifæri til þess að skipta yfir í búseturéttarleið og eignast búseturétt.

Að sérstakar húsaleigubætur eiga að ná til breiðari hóps en nú er.

Tryggja fjölbreytileika í húsnæðisframboði.

Að liðkað verði fyrir því að húsfélög og einstaklingar geti bætt aðgengi að eldra húsnæði.

Dæmi. Húsfélag í 4 hæða fjölbýlishúsi sækir um að koma á lyftu við stigaganginn nú á meðan full endurgreiðsla er af virðisaukaskatti vegna viðhalds og á tímum atvinnuleysis. Reykjavíkurborg auðveldar  afgreiðslu og fellir niður aukin fasteignagjöld á fyrsta ári.

Að fólk sé stutt í þeirri ákvörðun að búa heima með þeirri aðstoð sem hægt er að veita.

Að hugað verði að gæðum heimaþjónustu sem samþætt er við heimahjúkrun.

Að þeir sem búa á hjúkrunarheimilum og sameiginlegum heimilum vegna heilsu eða fötlunar eigi rétt á einkarými og haldi fjárhagslegu sjálfstæði sínu.

Atofna heimili fyrir utangarðskonur, án tafar.

Baráttan fyrir atvinnu er hornsteinn jafnaðarstefnunnar og forgangsmál við núverandi aðstæður. Öflugt og fjölbreytt atvinnulíf er alls staðar undirstaða velferðar og því lítur Samfylkingin á það sem eitt mikilvægasta hlutverk borgarinnar að efla og styrkja atvinnulífið í borginni. Upp á það hefur mikið skort síðustu ár.

Lykiláherslur Samfylkingarinnar í atvinnumálum og aðgerðum gegn atvinnuleysi eru:

• Nýsköpun, framtíðarsýn og samstarf
• Vaxtarsamningur Reykjavíkur og nágrennis
• Viðhald og verklegar framkvæmdir
• Grænn vöxtur
• Evrópska leiðin í fjármögnun á endurnýjun hverfa og fjárfestingu í innviðum

1.         Nýsköpun, framtíðarsýn og samstarf í atvinnumálum

Fyrsta verk Samfylkingarinnar við stjórn borgarinnar verður að efna til funda með samtökum í atvinnulífi og fulltrúum fyrirtækja og stofnana til að skilgreina stöðu, styrkleika og sóknarfæri atvinnulífs Reykjavíkurborgar til skamms og langs tíma. Samfylkingin flutti tillögu sama efnis þremur vikum eftir hrun en hún hefur verið í frestun að hálfu meirihlutans allar götur síðan. Meðal áherslusviða verkefnisins og sóknarfæra sem horft verður til verði:

1. Ferðamannaborgin Reykjavík
2. Hafnarborgin Reykjavík
3. Heilsuborgin Reykjavík
4. Hönnunarborgin Reykjavík
5. Kvikmyndaborgin Reykjavík
6. Menningarborgin Reykjavík
7. Orkuborgin Reykjavík
8. Skólaborgin Reykjavík
9. Tónlistarborgin Reykjavík
10. Verslunarborgin Reykjavík
11. Þekkingarborgin Reykjavík (nýsköpun, rannsóknir og þróun)
12. Þjónustuborgin Reykjavík

Samfylkingin vill:

Endurreisa, þróunar- og nýsköpunarfélag Reykjavíkurborgar í atvinnumálum. Það verði vettvangur samstarfs opinberra og einkaaðila um að laða fjárfestingu til borgarinnar, nýta sóknarfæri í atvinnumálum og leita leiða við að leiðbeina og auðvelda einstaklingum að stofna og reka fyrirtæki í Reykjavík. Meðal nýrra áherslusviða verði verkefni á sviði þekkingariðnaðar, kvikmyndagerðar og annarra skapandi greina.

Höfuðborgarstofa, viðburða- og markaðsskrifstofa Reykjavíkurborgar í ferðaþjónustu verði opnuð fyrir aðkomu, fjármagni og nánara samstarfi við ferðaþjónustufyrirtæki í Reykjavík. Sérstaklega verði kannaður grundvöllur til að fjölga viðburðum sem styðja við markaðssetningu Reykjavíkur gagnvart ferðamönnum utan háannatíma.

Átak verði gert til að kynna ráðstefnuborgina Reykjavík, ekki síst í tilefni af opnun Tónlistar- og ráðstefnhússins, Hörpunnar. Menning sem aflvaki atvinnulífsins fái verðugan sess í atvinnustefnu Reykjavíkur.

Kanna möguleika á eflingu alþjóðlegrar kvikmyndahátíðar og aðkomu Reykjavíkurborgar að samstarfi um rekstur kvikmyndahúss í miðborginni sem myndi helga sig sögu og sýningum á íslenskum kvikmyndum. Kanna fýsileika og sóknarfæri fyrir úthlutun lóðar fyrir alhliða kvikmyndaver í borgarlandinu.

Reykjavíkurborg skipi sér aftur í forystu í rafrænni stjórnsýslu og þjónustu.

Stutt verði við uppbyggingu þekkingar- og heilbrigðistengdra fyrirtækja með samstarfi um beina markaðssetningu á háskólasvæðum í Vatnsmýri í samvinnu við Háskóla Íslands, Háskólann í Reykjavík og Landsspítalann. Reykjavíkurborg greiði fyrir skipulagi stúdentaíbúða og annarra innviða sem stuðla að sömu markmiðum.

Styðja við nýsköpunarsetur, sprota-hótel og/eða listasmiðjur. Í því skyni verði kortlagt hvaða tækifæri geti falist í auðu og óseldu húsnæði víðs vegar um borgina, umfang þess og staðsetningu. Þá verði útfærðar leiðir til að tryggja notkun á auðu húsnæði og laða að smærri fyrirtæki inn í hverfi borgarinnar.

Einfalda leyfisveitingar og umsóknarferli fyrir þá sem vilja stofna til reksturs í Reykjavíkurborg. Þeim standi jafnframt til boða leiðsögn og aðstoð við öflun nauðsynlegra leyfa til reksturs sér að kostnaðarlausu.

2.         Vaxtarsamningur Reykjavíkur og nágrennis  - markviss efling alls atvinnulífs

Til að standa undir velferð og lífskjörum þarf að tryggja 3,5% meðalhagvöxt í Reykjavík næsta kjörtímabil. Vegna stöðu efnhagsmála þýðir þetta jafnframt að stefna þarf að um 5% hagvexti 2014. Til þess þarf margþættar aðgerðir sem ekki eru allar á færi Reykjavíkur heldur þarf að ná víðtækari samstöðu og samstarfi. Þessi tölulegu markmið eiga að vera markmið vaxtarsamnings Reykjavíkur, ríkisstjórnar, verkalýðshreyfingar, fyrirtækja, stuðningsstofnana atvinnulífsins og  annarra samtaka í atvinnulífi.

Höfuðborgarsvæðið er eitt atvinnusvæði og á í samkeppni við erlendar borgir um fólk og verðmæt fyrirtæki. Það er kominn tími til að sveitarfélög á höfuðborgarsvæðinu snúi bökum saman og styrki það sem valkost þegar kemur að búsetu og fyrirtækjarekstri.

Samfylkingin vill:

Að Reykjavíkurborg bjóði nágrannasveitarfélögum, ríkisstjórn, menntastofnunum og aðilum vinnumarkaðar til samstarfs um vaxtarsamning atvinnulífs á höfuðborgarsvæðinu.

Meginmarkmið samningsins yrðu að styrkja samkeppnishæfni fyrirtækja í virkri alþjóðlegri samkeppni, auka veltu, verðmætasköpun, útflutningstekjur og skapa þannig grunn fyrir umtalsverða fjölgun starfa á næstu misserum.

Að áherslur vaxtarsamningsins um nýsköpun nái til atvinnulífsins alls, jafnt fyrirtækja í hefðbundnum iðnaði og þjónustu sem byggja á gömlum grunni sem nýrra hátækni- og sprotafyrirtækja.

Leggja sérstaka rækt við þær greinar atvinnulífs í borginni sem skilað geta vexti á ábyrgan hátt á næstu misserum, s.s. ferðaþjónusta, upplýsingatækni, kvikmyndagerð, hönnun og aðrar skapandi greinar.

Stofnuð verði fjárfestingar- og atvinnumálastofa Reykjavíkurborgar sem fjárfestar og atvinnurekendur geta leitað til þegar þeir vilja byggja upp rekstur.

Að þróunar- og nýsköpunarfélag Reykjavíkurborgar í atvinnumálum kynni borgina með virkum hætti fyrir innlendum og erlendum fyrirtækjum í vexti. Leitað verði bestu erlendu fyrirmynda við útfærlu vaxtarsamningsins.

Vaxtarsamningur er formlegt samstarf sveitastjórna, ríkisvalds, aðila í atvinnulífinu og stuðningsstofnana um markvissar aðgerðir til að flýta fyrir vexti og framþróun hjá fyrirtækjum. Þessi leið hefur um árabil gefist vel í nágrannalöndum okkar, t.d. í Finnlandi, Svíþjóð, Danmörku og Bretlandi og er ein af lykilaðgerðum Evrópusambandsins við svæðisbundna eflingu byggða og atvinnulífs.

Náinni samvinnu fyrirtækja, þekkingarstofnana og fjárfestingaraðila er komið á, fyrirtæki í sama geira mynda klasa, skiptast á upplýsingum og vinna saman að sameiginlegum markmiðum s.s. markaðssetningu og að hækka þekkingar- og tæknistig. Dæmi um beinar aðgerðir er stuðningur við fyrirtæki sem vilja ráða rekstrarráðgjafa til að yfirfara ferla innan fyrirtæksins og auka skilvirkni og framlegð.

3.         Viðhald og verklegar framkvæmdir

Samfylkingin í Reykjavík vill þegar í stað bregðast við atvinnuleysi með forgangsröðun verkefna eftir því hve mörg störf þau skapa hjá hópum þar sem atvinnuleysi er mest. Samfylkingin í Reykjavík vill bjóða öðrum sveitarfélögum á höfuðborgarsvæðinu samstarf um aðgerðir gegn atvinnuleysi enda um eitt atvinnusvæði að ræða.

Samfylkingin vill:

Taka lán til að halda uppi framkvæmdastigi í kreppunni í stað þess að skera framkvæmdir niður um 70% eins og nú er ráðgert. Borgarsjóður ræður við þessar lántökur, hægt er að fá hagstæð tilboð og forða þannig algeru hruni í framkvæmda- og byggingariðnaði.

Tvöfalda viðhald á fasteignum borgarinnar árin 2011-2012 með því að flýta brýnum viðhaldsverkefnum sem annars hefðu komið til framkvæmda 2013-2015. Þannig skapast störf þegar mest þarf á þeim að halda.

Tryggja að borgin kaupi ávallt vinnu af viðurkenndum fagaðilum og girt sé fyrir undirboð kennitöluflakkara.

Setja fram heildstæða áætlun fyrir endurnýjun eldri hverfa að evrópskri fyrirmynd. Í stað þess að hverfin drabbist niður í kreppunni verði efnt til tímabærs viðhalds og endurnýjunar á húsum og opinberum byggingum, auk endurnýjunnar borgarumhverfis og útisvæða. Byrjað verði í Breiðholti.

Auka fjármagn til hreinsunar borgarlandsins, stígagerðar og uppbyggingar grænna svæða til að skapa fleiri sumarstörf fyrir námsmenn og ungt fólk.

Auðvelda breytingar á íbúðarhúsnæði sem bæta aðgengi fatlaðra og aldraðra og gera þeim kleift að búa lengur heima, með breytingum á íbúðum og gerð lyftuhúsa í fjölbýlishúsum. Þannig verði aukin eftirspurn eftir hönnuðum, arkitektum og iðnaðarmönnum.

Að eigendur niðurníddra húsa í borginni verði skikkaðir til að koma þeim í viðunandi horf en dagsektum beitt ef frestir eru ekki virtir. Borgin láti standsetja húsin á kostnað eigenda ef ekki er brugðist við aðgerðum borgarinnar.

Auka samstarf við Vinnumálastofnun um starfsþjálfunarsamninga, sérstök tímabundin átaksverkefni og ,,Starfsorku“ sem býður fullar atvinnuleysisbætur með hverjum starfsmanni á atvinnuleysisskrá í allt að eitt ár þegar ráðist er í nýsköpunarverkefni eða markaðssetningu erlendis.

4.         Grænn vöxtur í Reykjavík

Stöðugur vöxtur atvinnulífs í borginni til lengri tíma er best tryggður með atvinnustefnu sem byggir á styrkleikum borgarinnar í sátt við  umhverfið og umhyggju fyrir rétti komandi kynslóða.

Samfylkingin vill:

Móta orku- og auðlindastefnu þar sem áhersla er lögð á jafnrétti kynslóða, hámörkun langtímaávinnings og grænt orðspor borgarinnar.

Könnuð verði tækifæri til uppsetningar iðnaðar- og orkugarða t.d. á nýju atvinnusvæði á Hólmsheiði þar sem í boði verði orka á hagstæðu verði til starfsemi í græna hagkerfinu og þar sem sérstök áhersla verður lögð á að gera sem best í umhverfismálum framleiðslu- og iðnfyrirtækja.

Að innan áratugar verði annar hver bíll í Reykjavík knúinn innlendri, vistvænni orku. Borgin beiti sér fyrir markvissu átaki í samvinnu og samráði við löggjafa- og framkvæmdavald, nágrannasveitarfélög, fyrirtæki, frjáls félagasamtök og aðra þá aðila sem hjálpað geta til við að ná þessu markmiði.

Að borgin setji gott fordæmi með því að setja stofnunum og fyrirtækjum borgarinnar metnaðarfulla umhverfisstefnu með mælanlegum markmiðum. Jafnframt hvetji borgin einkafyrirtæki til þess sama, m.a. með viðurkenningum og hagrænum hvötum.

Styrkja nafn Reykjavíkur sem miðstöð í rannsóknum á jarðhita, endurnýtanlegum orkugjöfum og sjávarútvegi. Atvinna Reykvíkinga til framtíðar hvílir á skynsamlegri og hugvitssamlegri nýtingu auðlinda. Það ætti ekki að fara fram hjá neinum sem býr í eða heimsækir Reykjavík hve mikilvægar þessar auðlindir eru.

Grænn vöxtur felur m.a. í sér að horft verði til samfélagslegra áhrifa af nýtingu orkuauðlinda borgarinnar en ekki einungis einblínt á virkjunarþáttinn. Stefna þarf að aukinni fjölbreytni í orkusölu, að sem flest störf og mestur virðisauki skapist af virkjun orkunnar, að tæknistig- og þekking aukist og arðsemi til lengri tíma verði sem mest.

Reykjavík getur boðið upp á góð vaxtarskilyrði fyrir grænan iðnað með því að hlúa að mennta-, rannsóknar- og menningarstofnunum og samstarfi þeirra við atvinnulífið. Með metnaðarfullum markmiðum, svo sem um orkuskipti í samgöngum, getur Reykjavíkurborg lagt grunn að alþjóðlegum þróunarverkefnum á sviði græns iðnaðar.

Ýmis tækifæri hafa orðið til í nýsköpunargreinum sem hjálpa okkur að lifa í betri sátt við umhverfið. Áherslan á uppbyggingu atvinnuvega í sátt við umhverfið er alþjóðlegt fyrirbæri sem ekki einu sinni fjármálakreppan hefur bitið á. Þann geira köllum við græna hagkerfið. Þar er vaxtarbroddur sem vert er að sækja í.

5.         Evrópska leiðin

- fjármögnun á endurnýjun eldri hverfa, endurlán til lítilla og meðalstórra fyrirtækja og fjárfestingar í grænum samgöngum, innviðum og grænni orku

Samfylkingin vill að Reykjavíkurborg nýti þau tækifæri sem felast í stöðu Íslands sem umsóknarríkis að ESB. Samfylkingin hefur látið taka saman stutt yfirlit yfir samfélags- og uppbyggingasjóði Evrópusambandsins með sérstakri áherslu á borgarsvæði og fjármögnunarmöguleika þeirra. Möguleikar Reykjavíkurborgar eru miklir ef rétt er á málum haldið.

Samstarf við evrópskar fjármálastofnanir og samstarfsáætlanir gætu nýst Reykjavík og sveitarfélögum á höfuðborgarsvæðinu m.a. við:

1. endurskipulagningu á skuldum sveitarfélaga og fyrirtækja þeirra
2. fjármögnun á endurnýjun eldri hverfa og atvinnusvæða
3. fjárfestingar í grænni orku, orkuskiptum í samgöngum, hjóla- og göngustígakerfi og öðrum fjárfestingum í innviðum og umhverfismálum
4. uppbyggingu vísinda- og þekkingarklasa, t.d. á háskólasvæðum
5. endurlánum til lítilla og meðalstórra fyrirtækja

ÍTAREFNI

Uppbyggingarsjóðir ESB og aðrar fjármögnunarleiðir fyrir borgasvæði (Urban areas)

Uppbyggingarsjóðir ESB eru tveir (fyrir vestur Evrópu).  Áhersla lögð á styrkja samkeppni og byggja upp atvinnulíf (ekki forgangsröðun á fjárfestingu í mannvirkjum):

Svæðaþróunarsjóðurinn (ERDF = European Regional Development Fund)

Félagsmálasjóðurinn (ESF = European Social Fund)

Leiðir til að fjármagna mannvirki, innviði og uppbyggingu smáfyrirtækja á borgasvæðum – lykillánastofnanir:

Evrópski fjárfestingabankinn (EIB = European Investment Bank).

Veitir lán til fyrirtækja og verkefna á vegum hins opinbera sem falla að stefnu og áherslum ESB. Hefur verið lykilsamstarfsaðili Orkuveitu Reykjavíkur í jarðvarmavirkjunum. Aðildarviðræður gefa tækifæri til að dýpka samstarfið og láta það ná til endurskipulagningu skulda Orkuveitunnar og fjármögnun frekari framkvæmda fyrirtækisins.

Evrópski fjárfestingasjóðurinn (EIF = European Investment Fund).

Lánar og veitir áhættufjármagn til nýrra “smáfyrirtækja” (e.SMEs).  Ekki bein fjármögnun til fyrirtækjanna heldur um að ræða aðkomu að þróunarsjóðum/verkefnum í aðildarríkjum sem byggja á skýrri stefnu (sóknaráætlunum) borgasvæða.

Ýmsar stofnanir og áætlanir ESB eru notaðar til að tryggja markvissa nýtingu fjármuna evrópskra lánastofnana á borgasvæðum:

JASPERS. Veitir tæknilega aðstoð við undirbúning á stærri fjárfestingarverkefnum. Vinnur með EIB.

JESSICA. Veitir yfirvöldum ráðgjöf við uppbyggingu borgasvæða og greiðir fyrir aðkomu lánastofnana. Tengir saman styrki úr uppbyggingarsjóðum og lán frá EIB.

JEREMIE. Greiðir fyrir því að settir eru upp fjárfestingarsjóðir á afmörkuðum svæðum fyrir lítil fyrirtæki með hlutafjárþátttöku og lánatryggingum. Vinnur með EIF.

JASMINE. Veitir aðstoð við að koma á fjármögnun smærri verkefna. Vinnur með EIF.

Ýmsar fagáætlanir ESB eru nýttar sem farvegir fyrir fé og til að mynda tengslanet og leita fyrirmynda að velheppnuðum verkefnum:

Urbacht. Borgaáætlun – samstarfsnet borga innan ESB – ýmis fjölbreytt verkefni (sjá síðar).

Interregional. Byggðaáætlanir.  Mörg fjölbreytt verkefni geta opnast (sjá síðar).

CIP. Samkeppnis- og nýsköpunaráætlunin.  Veitir ríkulega styrki til fyrirtækja og stofnana.

Menningaráætlun. Styrkir m.a. menningarhátíðir og viðburði.

Rammaáætlun ESB. Einn angi áætlunarinnar styrkir sérstaklega svæði sem vilja leggja áherslu á rannsóknir og vísindaklasa.

Dæmi um aðgerðaráætlanir nokkurra aðildarríkja sem hlotið hafa fjármagn úr svæðaþróunarsjóðum (borgasvæði).

Danmörk

Almenn áhersla á að nýta fjármuni til að þjálfa fólk til að takast á við nýja tegund af störfum.  Styrkja stjórnendaþjálfun, auka tengsl milli vísinda- og atvinnulífs o.m.fl.  Landinu skipt í sóknarsvæði, þ.m.t höfuðborgarsvæði.

Finnland

Áhersla á að byggja upp öflugt borgarsvæði á Stór-Helsinki svæðinu. Klasar sem hafa víðar alþjóðlegar tengingar, nýsköpun og þróun.

Írland

Vistvæn borgaþróun, nýsköpun og þekkingariðnaður.  Áhersla á flugvelli og hafnir sem tengja Írland við Evrópu og lykilsvæði innan landsins.

Bretland

Sérstök aðgerðaráætlun fyrir London. Áhersla á nýsköpun og rannsóknir í atvinnulífinu, aðgang að fjármagni (fyrir lítil og meðalstór fyrirtæki) og að byggja upp borgahluta fyrir atvinnulíf á sjálfbærum grunni.

Nokkur dæmi um verkefni sem EIB hefur lánað til á undanförnum árum (beinar lánveitingar, í gegnum sérstaka (borga)þróunarsjóði og t.d. lánasjóði sveitarfélaga).  Lán frá EIB eru alltaf háð því að verkefnið falli að áherslum ESB og aðgerðaráætlun viðkomandi ríkis/héraðs (National Strategic Reference Framework og Operational Plans):

Danmörk

Lán til einkafyrirtækis (Vestas Windpower Technology) til að hanna, þróa og hefja framleiðslu á vindmyllum.

Lán til Rinkjöping Landbobank til að endurlána smáfyrirtækjum.

Lán til Alfa Laval til orkuverkefnis í tveimur bæjum í Danmörku og Svíþjóð.

Lán til einkafyrirtækis um þróun ensíma.

Lán til Aarhus borgar til að reisa sorpbrennslu og ganga frá fráveitu.

Finnland

Lán til Nokia til að þróa Smartphone.

Lán til vöruþróunar í pappírsiðnaði.

Lán til einkafyrirtækis til að þróa nýtingu og flutning á gasi í Póllandi í samstarfi við Svía.

Lán til nokkurra banka til að endurlána smáfyrirtækjum.

Lán til sveitarfélagsins Vantaa til að endurbæta ýmsar byggingar í eigu þess.

Lán til meiriháttar hafnargerðar í Vousaari skammt frá Helsinki.

Lán til byggingar sjúkrahúss á Uusimaa skammt frá Helsinki (hluti af stóru heilsutengdu verkefni).

Lán til að stækka og endurbæta alþjóðaflugvöllinn í Helsinki-Vaantaa.

Írland

Lán til Lánasjóðs sveitarfélaga sem mun endurlána til skilgreindra verkefna s.s. endurnýjun borgasvæða, umhverfisverkefna og uppbyggingu ferðaþjónustu.

Lán til endurnýjunar á alþjóðaflugvellinum í Dublin (hluti af TEN vegakerfi ESB).

Lán til Trinity College til að byggja nýja álmu sem á að hýsa nýtt rannsókna- og þjálfunarsetur í biomedical fields.

Lán til framkvæmda á M50 hraðbrautinni í kringum Dublin (bypass) (hluti af TEN vegakerfi ESB).

Ýmislegt

Lán til héraðsstjórnar Katalóníu á Spáni til ýmissa borgasvæða-verkefna, samgöngubóta, umhverfis- og menntunarverkefna.

Lán til uppbyggingar þriggja háskólasjúkrahúsa á norðvestur Spáni.

Lán til uppbyggingar á gámahöfn í Barcelona og til að byggja upp öflugar vegtengingar við höfnina.

Lán til að stækka tvo flugvelli á Kanaríeyjum.

Lán til að fara í ýmis lítil og meðalstór verkefni í Barcelona (urban regeneration s.s. samgöngubætur, endurnýjun á veitukerfi o.fl.).

Lán til að stækka höfnina í Las Palmas.

Lán til að endurbæta hraðbrautina á milli Glasgow og Sterling í Skotlandi sem er hluti af samgönguáætlun landsins til 2021.

Nokkur dæmi um JESSICA, JEREMIE o.fl.

Í lok síðasta árs (2009) var stofnaður, fyrir tilstuðlan JESSICA, sk. borgaþróunarsjóður í norðvestur Englandi. Peningar í sjóðinn koma frá uppbyggingarsjóðum ESB og EIB og mun hinn síðarnefndi halda utan um sjóðinn.  Í þennan sjóð geta sótt þær borgir á svæðinu sem vilja fara í vistvæn uppbyggingarverkefni. Sjóðurinn mun veita lán, eiginfjármagn og ábyrgðir.  Meðal verkefna sem verða styrk/lánshæf eru uppbygging á nýjum atvinnusvæðum, endurgerð niðurníddra svæða o.fl.  Markmiðið er að styrkja samkeppnishæfni svæðisins og skapa 15.000 störf á næstu fjórum árum.

Þróunarskrifstofa London borgar er að undirbúa stofnun JESSICA borgarþróunarsjóðs.

Svæðisráð á þremur svæðum í Bretlandi eru að undirbúa stofnun JEREMIE sjóðs.

Stjórnvöld í Skotlandi eru að undirbúa stofnun JEREMIE sjóðs í landinu.

Nokkur dæmi um Urbact verkefni sem nú eru í gangi (borgaryfirvöld nota hluta af styrkjum úr uppbyggingarsjóðunum til að vinna að þessum verkefnum og tengjast öðrum borgum til að þróa þau.  Þurfa að falla að áherslum ESB og aðgerðaráætlunum viðkomandi ríkis/héraðs):

Samstarfsverkefni nokkurra borga þar sem unnið er að áætlunum um verndun og samkeppnishæfni gamalla miðborga (preservation of cultural heritage and strengthen their competitiveness and attractiveness).

Þróun samstarfsnets um skapandi klasa (creative clusters) í borgum í Finnlandi, Bretlandi, Portúgal, Ítalíu og víðar.

Samstarfsverkefni þriggja borga í Bretlandi, Svíþjóð og á Spáni (100 – 200 þús íbúar) þar sem borgaryfirvöld vinna með háskólum að því að styrkja samkeppnishæfni borganna. Þekking og nýsköpun (skv. Lissabon áætluninni).

Samstarfsverkefni borga í Þýskalandi (Magdeburg), Austurríki (Vín), Bretlandi (Newcastle), Danmörk (Aarhus) og víðar sem miða að því að þróa og byggja upp vísinda- og þekkingarsvæði.

Verkefni sem miðar að því að aðstoða borgir sem hafa byggt á einhæfri atvinnustarfsemi til meiri fjölbreytni.

Samstarfsverkefni tíu borga sem miðar að því að þróa heilsu og heilsutengd verkefni ýmiskonar.  Bætt heilsa íbúanna = betri samkeppnishæfni borganna.

Nokkur dæmi um Interreg verkefni:

Þróun á notkun Open Source hugbúnaðar í opinberri stjórnsýslu.

Bætt umhverfi (environment) í úthverfum.

Gerð grænna áætlana fyrir borgasvæði.

Gerð aðgerðaáætlana fyrir niðurnídd iðnaðarsvæði (Brownfields).

Vistvæn uppbygging hafnasvæða.

Fyrsta spurning, Dagur. Það er kosið til borgarstjórnar 29. maí. Er einhver þörf á að skipta um meirihluta?

Þú ætlar ekki að byrja neinum smáspurningum! En reyndar er frábært að þú skulir vinda þér svona beint í efnið því ég held að þetta sé einmitt spurningin sem Reykvíkingar þurfa að spyrja sig. Svarið er hiklaust já. Það þarf að skipta og annað væri reyndar mjög sérstakt eftir það sem borgarbúum hefur verið boðið upp á þetta kjörtímabil.

Kosningarnar framundan snúast um það hvort Reykjavík sé best stýrt með hugmyndafræðinni sem kom okkur í hrunið, frjálshyggjunni sem Sjálfstæðisflokkurinn í borgarstjórn er svo sannarlega fulltrúi fyrir, eða jafnaðarstefnu Samfylkingarinnar sem leggur áherslu á atvinnu, öryggi og velferð, ný vinnubrögð og aðgerðir í þágu barna og fjölskyldna. Ráðhúsið í höndum Sjálfstæðisflokksins er í raun síðasta vígi þeirrar frjálshyggju á Íslandi, sem hefur reynst okkur svo ótrúlega dýr. Ég finn víða að fólk er ekki búið að gleyma því að þetta er sama fólkið og notaði milljarð úr sameiginlegum sjóðum til að kaupa sér borgarstjórastól fyrir Ólaf F. Magnússon. Þetta er hópurinn sem vildi selja þekkingarhluta Orkuveitunnar til Hannesar Smárasonar sem var með forkaupsrétt, þau vilja byggja fyrirtækjaleikskóla og einkavæða allt sem hægt er. Hugmyndafræði frjálshyggjunnar þarf langt frí.

“Ást, þorpin í borginni og ódýrari frístundir”

Góð kona vék að mér spakmæli sem mér skilst reyndar að sé runnið frá Nóbelsverðlaunahafanum Elie Wiesel: Andstæðan við ást er ekki hatur – heldur afskiptaleysi. Afskiptaleysi er rauður þráður í frjálshyggjunni. Til að stýra Reykjavík út úr kreppunni held ég raunar að þurfi bæði ást og trú á framtíðina. Við þurfum vissulega að vera tilbúin til að þola erfið ár. En með samtakamætti þar sem allir borgarbúar eru virkjaðir er ég fullviss um að við komumst ekki aðeins út úr þessu heldur getum við skapað hér betra og mannvænlegra samfélag.

Við eigum að hugsa um hvert einasta hverfi einsog þorp sem ber sameiginlega ábyrgð á því að börnin í þorpinu komist til manns. Að eldra fólk búi ekki afskipt og einangrað. Að svæðin milli húsanna séu sameiginlegur dvalarstaður og það sé metnaður allra að þau séu eins vistleg, hrein og fín og kostur er.

“Börn og fjölskyldur í fyrsta sæti”

Við þurfum líka að horfast í augu við að stressið og lífsgæðakapphlaupið hefur verið að drepa okkur. Núna þurfum við að endurskoða forgangsröðina. Einfalda hlutina og reyna að tryggja öllum gott líf, en fyrir minni pening. Við eigum að byrja á börnunum. Það er lykilverkefni á næstu árum að tryggja bjartari framtíð fyrir börnin okkar. Við þurfum skýra sýn og markvissar aðgerðir til að tryggja velferð, vinnu og tækifæri fyrir alla. Ekkert barn á að þurfa að hætta að stunda frístundir vegna kreppunnar. Við eigum að gera íþróttirnar, tónlistina og frístundirnar ódýrari, kannski með einfaldari umgjörð eða ódýrari búningum, færri skópörum eða keppnisferðum. Höldum skiptimarkaði með allt þetta dót sem við erum að kaupa. Hjálpumst að og gerum öllum kleift að vera með. Ég hef rætt þetta við hundruð foreldra, sem aftur hafa rætt þetta við börnin sín. Það ber flestum saman um að við vorum komin framúr okkur á ýmsum sviðum og getum vel endurskoðað hlutina án þess að glata því sem skiptir mestu fyrir börnin okkar.

“Hvað hefði Samfylkingin gert öðru vísi?”

Ef við horfum aftur til ársins 2006 og gefum okkur að Samfylkingin hefði haft forystu í  borgarstjórninni þetta kjörtímabil, hvað hefðuð þið gert öðruvísi?

Í mörgum mikilvægum málum boðaði Samfylkingin allt aðrar leiðir en Sjálfstæðisflokkurinn. Við töluðum fyrir ábyrgri stefnu í lóða- og skipulagsmálum. Það var kallað „lóðaskorts-stefna“. Við vöruðum við því þegar Sjálfstæðisflokkurinn byrjaði að ryðja út lóðum og hraða útþenslunni í upphafi kjörtímabilsins. Það dugðu engin rök um viðkvæman fasteignmarkað og hættuna af því að sitja uppi með hálfbyggð hverfi. Því fór sem fór og ónýttir innviðir á höfuðborgarsvæðinu eru á annað hundrað milljarða.

Hverfin og þjónustan innan þeirra eru líka okkar hjartans mál. Við viljum flytja fé og fólk úr yfirstjórn í þjónustuna úti í hverfum borgarinnar. Undan þessu hefur Sjálfstæðisflokkurinn grafið og fært ýmsa þjónustuþætti inn á skrifstofur í miðborginni. Þarna er skýr munur á tilhneigingu Sjálfstæðisflokks til miðstýringar og hugmyndum Samfylkingar um hverfalýðræði og valddreifingu sem við viljum auka en hefur nánast verið lamað með áhugaleysi á þessu kjörtímabili.

“Skýr munur: atvinnumál og áhersla á öruggt leiguhúsnæði”

Atvinnumálin draga líka fram skýran mun á ábyrgri jafnaðarstefnu og aðgerðalausri frjálshyggju. Eitt brýnasta málið í núverandi stöðu er að það þarf að rjúfa doðann yfir ráðhúsinu og láta aðgerðir koma í stað aðgerðaleysis. Reykjavík á að vera aflið sem rífur okkur upp úr kreppunni. Það er okkar stefna. Samfylkingin hefur flutt ótal tillögur, ekki síst eftir hrun, um frumkvæði Reykjavíkur og nauðsyn á nýrri framtíðarsýn í atvinnumálum. Þau mál hafa öll verið látin sitja á hakanum á meðan Sjálfstæðisflokkurinn situr og bíður eftir því að markaðurinn leysi málið. Við höfum staðið vörð um störfin, viljum átak í viðhaldsverkefnum, samstarf um eflingu skapandi greina, kraft í markaðssetningu og ferðaþjónustu. Við viljum vinna með háskólunum að eflingu þekkingarklasa, og auk þess hefur Samfylkingin lagt áherslu á að nýsköpunarsetur og ýmis önnur starfsemi byrji í húsnæði sem stendur autt. Tómt húsnæði er tómt bull.

Húsnæðismál fjölskyldna eru reyndar annað gott dæmi um skýran mun. Þar lögðum við ríka áherslu á að fólk, sér í lagi ungar fjölskyldur sem voru að stíga fyrstu skrefin á vinnumarkaði, hefði val um að kaupa séreign eða leigja á traustum almennum leigumarkaði þar sem hægt væri að búa við alvöru öryggi. Hefði Samfylkingin haft forystu í borgarstjórninni hefði áhersla verið lögð á að ungar fjölskyldur og reyndar hver sem er gæti valið að leigja sér íbúðir í barnvænu umhverfi þar sem stutt er í leikskóla, skóla, matvöruverslun, heilsugæslu og aðra nauðsynlega þjónustu. Þarna hefðu ungu fólki verið skapaðir valkostir í stað þess að bjóðast það eitt að skuldsetja sig upp í topp nýkomin út á vinnumarkaðinn eins og staðreyndin varð. Og þetta verkefni er ennþá brýnt, eða ætlum við enn og aftur að láta næstu kynslóð velja á milli 90% lána eða myntkörfu?

“Pólitík snýst um forgangsröðun”

Hvernig heldurðu að þessi kosningabarátta þróist?

Það er erfitt að spá. Ég held að hún verði stutt og snörp. Líklega fer hún ekki á flug fyrr en í lok apríl eða byrjun maí. Við í Samfylkingunni ætlum að leggja höfuðáherslu á að hitta Reykvíkinga, hlusta á sjónarmið þeirra og tala fyrir okkar áherslum.

Við erum með heimafundi í öllum hverfum þar sem hægt er að hitta frambjóðendur yfir kaffibolla. Þegar er búið að halda tugi funda, og þeir hafa verið ótrúlega innihaldsríkir og skemmtilegir. Þeir sem hafa áhuga á að vera með eða taka þátt eiga því ekki að hika við að hafa samband.

Við verðum jafnframt með stórt Reykjavíkurþing þann 24. apríl sem við skorum á alla að mæta á. Það verður haldið í Fjölbrautaskólanum í Breiðholti og verður lykilviðburður í okkar kosningaundirbúningi.

Samfylkingin leggur sig fram um að vera skýr valkostur. Jafnaðarstefnan varð að mörgu leyti til í glímu við kreppuna miklu fyrir næstum einni öld. Lykiláherslurnar á velferð og vinnu eiga enn við og sjaldan brýnna erindi en nú.

Ég hvet borgarbúa líka að kynna sér málin og leita sér upplýsinga. Og stundum koma raunar upp mál sem kristalla muninn á flokkunum. Eins og þessar vikurnar þegar borgarstjóri Sjálfstæðisflokksins ætlar að láta samþykkja að verja 230 milljónum í að stækka golfvöll um níu holur á meðan skólafólk og stjórnendur Reykjavíkurborgar eru að reyna að ná endum saman í niðurskurðinum fyrir næsta ár. Þetta er fráleitt en er án efa hugsað til að lokka einhver atkvæði golfáhugafólks til Sjálfstæðisflokksins. Það hefði hugsanlega gengið 2006 en ekki núna. Stjórnmálin í dag verða að vera í tengslum við þann veruleika sem borgarbúar eru að glíma við. Pólitík snýst um forgangsröðun. Golf er ágætt en níu viðbótarholur verða að bíða þar til við sjáum fram úr kreppunni. Fyrst þarf að tryggja velferð fyrir alla, atvinnu fyrir alla – og tækifæri fyrir alla. Það er kjarni jafnaðarstefnunnar.