• Fjölgað verði beinum atkvæðagreiðslum um mikilvæg mál og settur skýrari rammi um framkvæmd þeirra.
• Samráð verði haft við íbúa og foreldra í skipulags-, umhverfis- og skólamálum, það gert markvissara og stutt við aðkomu þeirra að lykilákvörðunum.
• Nefndum verði fækkað og hið pólitíska stjórnkerfi einfaldað. Sambærileg endurskoðun fari fram á stjórnsýslunni.
  • Borgarráð taki við verkefnum framkvæmda- og eignaráðs.
  • Menntaráð og leikskólaráð sameinist og nefnist „Menntaráð“.
  • Skipulagsráð nefnist „Skipulags- og samgönguráð“ og taki við samgöngumálum af umhverfis- og samgönguráði.
  • Umhverfisráð nefnist „Umhverfis- og auðlindaráð“. Ráðið fari með stefnumótun í orku- og auðlindamálum og taki einnig við verkefnum heilbrigðisnefndar.
  • Framtalsnefnd verði lögð niður og verkefni hennar lögð undir velferðarráð.
  • Stjórnsýsla í ráðhúsi verði endurskipulögð og einfölduð.
  • Hverfaráð verði efld.
• Skerpt verði á verkaskiptingu milli stjórnmálamanna og embættismanna.
• Öll störf hjá Reykjavíkurborg, önnur en pólitískra aðstoðarmanna, verði auglýst og ráðningar ákveðnar á faglegum forsendum.
• Siðareglur borgarstjórnar verði endurskoðaðar.
• Reykjavíkurborg þrýsti á að sett verði á stofn siðanefnd á vegum Sambands íslenskra sveitarfélaga til að úrskurða í álitamálum og þegar grunur vaknar um brot á siðareglum.

Hverfastefna

• Aukin verkefni og fjárráð flytjist til hverfaráðanna.
• Í samráði við íbúa og starfsfólk verði útfærðar tillögur um hvernig best sé að draga úr miðstýringu og auka sjálfstæði hverfanna með eflingu hverfaráða, hverfatengdrar þjónustu og forgangsröðun í rekstri innan hverfis.

Innflytjendur og jafnréttismál

• Þjónustu- og ráðgjafarhlutverk borgarinnar við innflytjendur verði endurskoðað í samráði við fulltrúa innflytjenda, önnur sveitarfélög, og ríkið.
• Fjölmenningu og framlagi innflytjenda til samfélagsins verði gert hærra undir höfði.
• Félög innflytjenda taki þátt í stefnumótun borgarinnar.
• Þátttaka barna og ungmenna af erlendum uppruna í frístundastarfi verði aukin í samstarfi við íþróttafélög, skólahljómsveitir, lífsskoðunarfélög og listaskóla.
• Móðurmálskennsla barna af erlendum uppruna og íslenskukennsla fyrir innflytjendur verði efld í samstarfi við grasrótarsamtök.
• Þróun kynbundins launamunar verði könnuð reglulega og brugðist við henni með áætlun sem hefur það að markmiði að honum verði útrýmt að fullu.
• Mörkuð verði stefna um jafnréttisfræðslu. Grunn- og leikskólar mæti þörfum bæði stráka og stelpna.
• Mótuð verði aðgerðaráætlun gegn ofbeldi og einelti. Tryggt verði að allt starfsfólk borgarinnar bregðist markvisst við þegar grunur leikur á um ofbeldi og einelti.

Allskonar

• Borginni verði stjórnað með bros á vör.
• Stefnt skal að því að þróa „norðurhjaragarð“ í Fjölskyldu- og húsdýragarðinum með sérstakri áherslu á náttúruvernd og tengingu hans við skólana í borginni.
• Bílaumferð á tilteknum svæðum í miðborginni verði takmörkuð í tilraunaskyni.
• Hálfbyggð skólahverfi verði kláruð. Útþensla borgarinnar verði stöðvuð.
• Áhersla verði lögð á samveru og sameiningu kynslóðanna. Markvisst verði unnið að því að rjúfa félagslega einangrun, sérstaklega aldraðra, í samvinnu við einstaklinga, félög og stofnanir í hverfum. Drepum ekki gamla fólkið úr leiðindum.
• Lýðræðis- og ábendingagáttin „Betri Reykjavík“, www.betrireykjavik.is, verði þróuð frekar á vef Reykjavíkurborgar. Hugað verði að aðgengi þeirra sem ekki eru nettengdir að umræðum og ákvarðanatökum.
• Eigendur niðurníddra húsa í borginni verði hvattir til að koma þeim í viðunandi horf. Dagsektum verði beitt ef frestir til aðgerða eru ekki virtir.
• Embætti borgarstjóra verði fært nær borgarbúum.

Atvinna

• Efnt verði til funda með samtökum í atvinnulífi og fulltrúum fyrirtækja og stofnana til að skilgreina stöðu, styrkleika og sóknarfæri atvinnulífs Reykjavíkurborgar til skemmri og lengri tíma.
• Einangrun og óvirkni ungra atvinnuleitenda verði rofin með samstarfi ríkis og borgar, stéttarfélaga, símenntunarmiðstöðva, ÍTR, grunn- og framhaldsskóla.
• Nágrannasveitarfélögum, ríkisstjórn, menntastofnunum og aðilum vinnumarkaðar verði boðið til þátttöku í samningi um vöxt atvinnulífsins á höfuðborgarsvæðinu. Markmið samningsins verður að styrkja samkeppnishæfni fyrirtækja í virkri alþjóðlegri samkeppni, auka veltu þeirra, verðmætasköpun, útflutningstekjur og skapa þannig grunn fyrir umtalsverða fjölgun starfa á næstu misserum.
• Þróunar- og nýsköpunarfélag Reykjavíkurborgar í atvinnumálum verði endurreist. Það verði vettvangur samstarfs opinberra og einkaaðila um að fjölga nýjum fjárfestingum í borginni.
• Höfuðborgarstofa, viðburða- og markaðsskrifstofa Reykjavíkurborgar í ferðaþjónustu, verði opnuð fyrir aðkomu, fjármagni og nánara samstarfi við ferðaþjónustufyrirtæki.
• Mörkuð verði heildarstefna fyrir afþreyingu ferðamanna í Reykjavík, með sérstakri áherslu á fjölskyldufólk.
• Stutt verði sérstaklega við hátíðir og viðburði sem eiga sér stað utan háannatíma í komu ferðamanna.
• Átak verði gert í að gera Reykjavík enn ferðamannavænni, til dæmis með merkingum og upplýsingaskiltum á erlendum tungumálum.
• Stutt verði við uppbyggingu þekkingar- og heilbrigðistengdra fyrirtækja með samstarfi um beina markaðssetningu á háskólasvæðunum í Vatnsmýrinni í samvinnu við Háskóla Íslands, Háskólann í Reykjavík og Landspítalann. Reykjavíkurborg greiði fyrir skipulagi stúdentaíbúða og annarra innviða sem stuðla að sömu markmiðum.

Börn og skólar

• Leikskóla- og menntaráð verði sameinuð og heiti ”menntaráð” enda er leikskólastigið fyrsta skólastigið og mikilvægt að skapa tengsl milli menntunar allt frá upphafi leikskólagöngu til loka framhaldsnáms.
• Borginni verði mörkuð barna- og fjölskyldustefna.
• Systkinaforgangur verði tekinn upp í leikskólum.
• Leik- og grunnskólar og frístundaheimili móti sér menningarstefnu á grundvelli „Vegvísis til listfræðslu“ (UNESCO) og gerð verði áætlun um samstarf þeirra við listamenn og menningarstofnanir.
• Skólar geti keppt um ,,Menningarfána“. Skólar sem skara fram úr í menningar- og listfræðslu fengju þannig viðurkenningu. Slíkum fánum gæti fjölgað eftir áherslum í skólasamfélaginu hverju sinni, t.d. bættust við vísindafáninn, heilsufáninn.
• Starfsdagar og frí í leik- og grunnskólum verði samræmdir innan hverfa.
• Samhliða aukinni fagmennsku með lengingu kennaranáms leggi leikskólinn aukna áherslu á ögrandi viðfangsefni við hæfi hvers og eins barns.
• Stefnt verði að því að samþætta skóla- og frístundastarf með nýjum leiðum, svo kraftar allra nýtist í þágu barnanna.
•  Foreldrum verði gert kleift að láta skoðun sína á skóla barna sinna í ljós með stuttum rafrænum skoðanakönnunum með reglulegu millibili.
• Samstarf leik- og grunnskóla verði aukið í verkefnum tengdum málþroska og byrjendalæsi.
• Listnám og hreyfing verði í boði á skólatíma og í skólahúsnæði. Leitað verði leiða til að sem flest börn geti notið listkennslu og hreyfingar.
• Samstarf þeirra sem koma að menntun, umönnun og uppeldi barna og ungmenna verði aukið. Þjónusta, stuðningur og ráðgjöf við börn, fjölskyldur og skóla á heima úti í hverfunum. Skólarnir verði opnaðir fyrir þátttöku foreldra og sjálfboðaliða.
• Hugað verði að byggingu nýs sérskóla þar sem starfsemi Öskjuhlíðar- og Safamýrarskóla fer undir eitt þak. Skóli án aðgreiningar verði sem fyrr hornsteinn menntastefnu borgarinnar.
• Tækifæri til kennara- og skólastjóraskipta verði athuguð með það að markmiði að stuðla að útbreiðslu þekkingar, auknu samstarfi milli skóla og starfsþróun.
• Skólastjórar verði ráðnir til ákveðins árafjölda í senn en heimilt verði að endurnýja samninga að þeim tíma liðnum.
• Auka skal vægi siðfræði, heimspeki, tjáningar og samvinnu í námi barna í leik- og grunnskólum og á frístundaheimilum.
• Aðgerðir til að vinna gegn áhugaleysi stráka í skólum verði forgangsmál. Karlkennurum verði fjölgað eins og kostur er.

Viðhald og verklegar framkvæmdir

• Sumarið 2010 verði kapp lagt á að gera sameiginleg græn svæði og leiksvæði borgarinnar fín og íbúum, hópum og félagasamtökum boðið að taka þau að sér. Sérstök áhersla verði lögð á ömmu- og afaróló þar sem kynslóðirnar geti notið lífsins saman.
• Settur verði upp ábendingarvefur um nauðsynlegar viðhaldsframkvæmdir í Reykjavík.
• Framkvæmdaáætlun Reykjavíkurborgar verði tekin til endurskoðunar og stefnt að því að tvöfalda viðhald á fasteignum borgarinnar árin 2011-2012. Með því að flýta brýnum viðhaldsverkefnum, sem annars hefðu komið til framkvæmda 2013-2015, skapast störf þegar mest þarf á þeim að halda.
• Sett verði fram heildstæð áætlun um endurnýjun eldri hverfa. Í stað þess að hverfin drabbist niður í kreppunni verði lögð áhersla á viðhald og endurnýjun á opinberum byggingum, auk endurbóta á borgarumhverfinu og útisvæðum.
• Eflingu mannlífs og borgarmyndar í Efra-Breiðholti verði hleypt af stokkunum undir merkjum átaksins: „111 Reykjavík“.
• Liðka skal fyrir samstarfi við Vinnumálastofnun um starfsþjálfunarsamninga, sérstök tímabundin átaksverkefni og ,,Starfsorku“ sem býður fullar atvinnuleysisbætur með hverjum starfsmanni á atvinnuleysisskrá í allt að eitt ár þegar ráðist er í nýsköpunarverkefni eða markaðssetningu erlendis.

Meira allskonar

• Stefnt er að því að beita óvenjulegum aðferðum til að auka náungakærleik í borginni okkar.
• Grænum svæðum innan borgarmarkanna verði betur sinnt og þau gerð líflegri.
• Menningarsögu kvenna í borginni verði gert hærra undir höfði.
• Við uppbyggingu íþróttaaðstöðu verði fyrst horft til þeirra hverfa þar sem lítil aðstaða er í boði, til dæmis Grafarholts, Norðlingaholts og Úlfarsárdals.
• Kannaður verði möguleiki á eflingu alþjóðlegrar kvikmyndahátíðar í Reykjavík og stutt við hugmyndir um „kvikmyndastofu“, heimili kvikmyndanna í Regnboganum.
• Útfærðar verði leiðir til að tryggja notkun á auðu húsnæði og laða smærri fyrirtæki að hverfum borgarinnar.
• Leiðindi í borgarkerfinu verði leituð uppi og þeim útrýmt nema ríkir almannahagsmunir geri þau algjörlega nauðsynleg. 
• Stofnun fyrirtækja verði einfölduð. Einfalda skal leyfisveitingar og umsóknarferli fyrir þá sem vilja stofna til reksturs í Reykjavíkurborg.
• Auðvelda skal fólki að gera breytingar á íbúðarhúsnæði til að bæta aðgengi fatlaðra og aldraðra. Með því er þeim gert kleift að búa lengur heima. Jafnhliða eykst eftirspurn eftir vinnu hönnuða, arkitekta og iðnaðarmanna.

Umhverfis- og auðlindamál

• Umhverfis- og samgönguráð Reykjavíkur verði „Umhverfis- og auðlindaráð“ og fái það hlutverk að móta orku- og auðlindastefnu borgarinnar.
• Sameiginlegt eignarhald borgarbúa á auðlindum í borgarlandinu verði tryggt og kveðið á um eðlilegt afgjald af þeim.
• Orkuskipti í samgöngum og rafvæðing samgangna verði forgangsmál til framtíðar.
• Stefnt verði að því að innan áratugar verði a.m.k. annar hver bíll í Reykjavík knúinn innlendri, vistvænni orku. Borgin beiti sér og Orkuveitu Reykjavíkur fyrir markvissu átaki í þessu efni í samvinnu og samráði við löggjafa- og framkvæmdavald, nágrannasveitarfélög, fyrirtæki, frjáls félagasamtök og aðra þá aðila sem hjálpað geta til við að ná þessu markmiði.
• Sett verði skilgreind og tímasett markmið um samdrátt í losun gróðurhúsalofttegunda í Reykjavík.
• Borgin gangi fram með góðu fordæmi þegar kemur að endurnýjun bílaflota hennar og byggi hann upp á raf- og metanknúnum bílum.
• Áhersla skal lögð á að vernda ströndina þar sem hún er ósnortin og græna trefilinn umhverfis höfuðborgarsvæðið.
• Borgin setji gott fordæmi með því að setja stofnunum og fyrirtækjum borgarinnar metnaðarfulla umhverfis- og samgöngustefnu með mælanlegum markmiðum.
• Leitast skal við að styrkja nafn Reykjavíkur sem miðstöð í rannsóknum á málefnum norðurslóða, loftslagsbreytinga, jarðhita og endurnýtanlegum orkugjöfum.
• Unnið verði að því að stórauka endurvinnslu.
• Kannaður verði grundvöllur fyrir því að umhverfisvotta Reykjavík. 

Skipulags- og samgöngumál

• Skipulagsráð verði „Skipulags- og samgönguráð“ til að undirstrika samhengi skipulags- og samgangna í borgarmyndinni.
• Svæðiskipulagsráð eða annar sameiginlegur vettvangur sveitarfélaga höfuðborgarsvæðisins hafi vald til að móta og stýra stefnu á sviði landnotkunar, byggðaþróunar, samgangna- og umhverfismála. 
• Reykjavík eigi frumkvæði að því að unnið verði nýtt svæðisskipulag sem nái frá Reykjanesi í vestri, Árborgarsvæðinu í austri og Borgarnesi í norðri, og að til verði sameiginleg sýn á umhverfis-, atvinnu- og húsnæðismál á öllu svæðinu. 
• Réttur íbúanna á að vera skýr og öllum skiljanlegur. Þeim á að bjóðast ókeypis mat hlutlausra sérfræðinga á byggingarmagni, hæðum, nýtingarhlutfalli, skuggavarpi og umferðarspám. Málsmeðferð í skipulags- og byggingamálum verði einfölduð og þjónustumiðuð.
• Hugað verði sérstaklega að sameiginlegum borgarrýmum, svo sem Hlemmi, Ingólfstorgi, Lækjartorgi, Óðinstorgi, Vitatorgi, Spönginni, Árbæjartorgi og fleiri.
• Með betra borgarskipulagi, blöndun byggðar, styttingu á vegalengd milli heimila og vinnu, betri almenningssamgöngum og bættri aðstöðu fyrir gangandi og hjólandi vegfarendur verði dregið úr þörfinni fyrir sífellt stærri og dýrari umferðarmannvirki.
• Færri mislæg gatnamót, fleiri einlæg gatnamót!
• Hjólandi og gangandi njóti forgangs í umferðinni. Götur verði gerðar fallegri. Hjólreiðaáætlun verði unnin fyrir höfuðborgarsvæðið og hrint í framkvæmd í Reykjavík.
• Farið verði í markvissar aðgerðir til að draga úr umferðarhættu, svifryks- og hávaðamengun í borginni. Dregið verði úr notkun nagladekkja og umferðarhraða, og bílastæðareglur endurskoðaðar.
• Auka skal ferðatíðni og bæta leiðakerfi strætós. Tryggt verði að strætó gangi alla daga ársins. Strætó fái forgang á stofnleiðum og leiðakerfið taki mið af því að börn komist milli heimila sinna og frístundastarfs.
• Lögð verði áhersla á endurnýjun úr sér genginna iðnaðar- og verslunarsvæða og þéttingu byggðar. Áhersla verði lögð á endurskipulagningu Elliðavogs- og Höfðasvæðis. Skipulagi Mýrargötusvæðisins og Gömlu hafnarinnar verði lokið. Þegar fasteignamarkaður kemst í eðlilegt horf verði hafin uppbygging við Hlemm og á völdum svæðum í Vatnsmýri.
• Við skipulag nýrra hverfa og endurnýjun gamalla hverfa verði stefnt að því að þar ríki félagslegur fjölbreytileiki. Leiguíbúðir verði minnst fimmtungur íbúða á nýjum byggðarsvæðum. Unnið verði að jöfnu aðgengi fyrir alla borgarana, innan húss sem utan.
• Byggðamynstrið í miðborg Reykjavíkur verði verndað. Heildstæð húsverndaráætlun fyrir alla borgina verði hluti af nýju aðalskipulagi Reykjavíkur.
• Gert verði ráð fyrir lestartengingu milli Vatnsmýrar og Keflavíkurflugvallar í nýju aðalskipulagi þar sem unnið verður að því að Vatnsmýrin byggist upp í áföngum.
• Teknar verði upp viðræður um framtíð flugvallarsvæðisins í Vatnsmýri.

Fjölskyldur og velferð

• Þjónustumiðstöðvar í hverfum verði efldar svo öll nærþjónusta sé á einum stað og að hún sé vel kynnt íbúum.
• Tekið verði af myndugleik á vanda útigangsfólks og tillögur gerðar um úrbætur í samráði við félagasamtök og fagfólk.
• Samþætt heimaþjónusta og heimahjúkrun verði hverfisbundin. Unnið verði að nánari samstarfi og samvinnu við heilsugæsluna.
• Skipulag barnaverndar verði yfirfarið og almennu barnaverndarstarfi sinnt á þjónustumiðstöðvum.
• Frístundakort barna verði „opnað“ svo hægt verði að bæta inn á það greiðslum.
• Stefnt verði að því að tryggja að samanlögð fjárhags- og húsnæðisaðstoð nái lágtekjumörkum Hagstofunnar sem eru nú 160.800 kr. á mánuði. Stefnt verði að því að fjárhagsaðstoð sé ekki langtímaúrræði.
• Öllum sem eru á framfærslu borgarinnar lengur en í 3 mánuði verði boðið upp á ráðgjöf, námskeið og önnur úrræði til að auka möguleika þeirra á virkri þátttöku í samfélaginu.
• Reykjavíkurborg leiti eftir auknu samstarfi við Vinnumálastofnun um leiðir til úrbóta á aðstæðum þeirra sem eru utan vinnumarkaðar.
• Markvisst verði unnið að flutningi þjónustu fatlaðra og aldraðra frá ríki til sveitarfélaga. Reykjavíkurborg hafi forgöngu um þróun þjónustunnar. Notendastýrð þjónusta verði þróuð samhliða yfirflutningi eins og samtök fatlaðra hafa haft forgöngu um.
• Mótuð verði þjónustustefna fyrir eldri borgara í Reykjavík í samstarfi við samtök þeirra.
• Félagsmiðstöðvar í hverfum og þær listasmiðjur sem nú eru að mestu sóttar af eldri borgurum verði einnig opnaðar fyrir foreldra með ungbörn, atvinnuleitendur og aðra hópa sem gagn og gaman kynnu að hafa af því.

Húsnæðismál

• Stuðlað verði að fjölbreytileika í framboði á húsnæði og félagslegri fjölbreytni í hverfum.
• Fólk verði stutt í þeirri ákvörðun að búa heima með þeirri aðstoð sem þar  er hægt að veita því. 
• Reykjavíkurborg stuðli að vexti og viðgangi húsnæðissamvinnufélaga, leigu- og búsetusamtaka í almannaþágu.
• Skoðað verði hvort Félagsbústaðir verði hluti af stærra húsnæðissamvinnu- og búseturéttarfélagi á öllu höfuðborgarsvæðinu.
• Íbúar í húsnæði á vegum borgarinnar hafi tækifæri til þess að skipta yfir í búseturéttarleið og eignast búseturétt.

Enn meira allskonar

• Höfuðborgarsvæðið er sambýli. Litið verði á höfuðborgarsvæðið sem eina heild. Opnað verði á viðræður um hvers kyns sameiningu og nánari samvinnu sveitarfélaga á höfuðborgarsvæðinu.
• Stofnað verði embætti „Umboðsmanns borgarbúa“ sem leiðbeinir íbúunum í samskiptum þeirra við embætti og stofnanir borgarinnar og veitir þeim ráðgjöf um rétt sinn.
• Teknar verði upp viðræður um að Reykjavíkurborg reki tilraunaskóla fyrir 13-18 ára nemendur.
• Öllum börnum standi til boða morgunverður og hollur hádegismatur í skólum og leikskólum á viðráðanlegu verði. Kannaður verði sá kostur að skólamáltíðir verði fjármagnaðar með valgreiðslum foreldra og annarra útsvarsgreiðenda í Reykjavík.
  • Dagbók borgarstjóra verði opin almenningi og aðgengileg á vef Reykjavíkurborgar.
  • Opnir hverfafundir borgarstjóra verði endurvaktir.
• Flutningur húsa úr Árbæjarsafni á því sem næst upprunalega staði sína eða í húsasöguþyrpingu í Hljómskálagarðinum verði kannaður.

Fjármál

• Velferð og þjónusta við íbúana njóti forgangs við ráðstöfun fjármuna borgarinnar.
• Fjármál Reykjavíkurborgar eru fjármál borgarbúa. Fjármál borgarinnar verða sett fram á mannamáli og með myndrænum hætti sem öllum er skiljanlegur.
• Unnin verði áætlun um efnahags- og fjármálastjórn Reykjavíkurborgar til fimm og tíu ára. Samhliða gerð hennar verði unnar fjármálareglur, stefna um áhættu- og lánastýringu þar sem fjárhagslegt eftirlit verði styrkt í ljósi reynslunnar. Áætlunin og stefnan nái jafnt til borgarsjóðs og fyrirtækja borgarinnar.
• Góð meðferð almannafjár verði höfð að leiðarljósi í öllum rekstri Reykjavíkurborgar.
• Styrkveitingar borgarinnar verði teknar til endurskoðunar. Farið verði yfir forsendur styrkja og samstarfssamninga borgarinnar, ásamt eftirliti með notkun þeirra og árangursmati. Þeir sem njóti styrkja skuldbindi sig til að vera með opið bókhald.

Þjónusta

• Átak verði gert í netvæðingu þjónustu Reykjavíkurborgarinnar.
• Þjónusta borgarinnar á að taka mið af þeim sem nota hana. Allt viðmót þjónustu við íbúana verði einfaldað.
• Markmið þjónustunnar og tímafrestir verði skilgreind þar sem því verður við komið. Framkvæmd þjónustunnar endurspegli þann rétt sem Reykvíkingar eiga á faglegri þjónustu, skilvirkni og góðri nýtingu fjármuna.
• Borgin taki upp stöðugt árangursmat þjónustu á sem flestum sviðum og unnið verði að því að innleiða vottuð gæðakerfi þar sem við á.

Fyrirtæki borgarinnar

• Eigendastefna verði skilgreind fyrir fyrirtæki og byggðasamlög í eigu borgarinnar.
• Tryggja þarf að stefna Reykjavíkurborgar nái fram að ganga í samræmi við eignahluti borgarinnar í byggðasamlögum og fyrirtækjum borgarinnar að teknu eðlilegu tilliti til hagsmuna og sjónarmiða minnihlutaeigenda.
• Innra eftirlit veiti virkt aðhald í borgarkerfinu og reglubundið árangursmat verði ófrávíkjanleg regla í öllum rekstri.

Allskonar allskonar

• Ávallt verði lögð áhersla á bjarta framtíð Reykjavíkur.

Fyrstu verk

Borgarbúar

• Útigangskonum verði búið öruggt húsaskjól fyrir fyrstu snjóa í haust.
• Systkinaforgangur verði tekinn upp í leikskólum.
• Ókeypis verði fyrir börn í sund í sumar.
• Settur verði upp innileikvöllur í Perlunni.
• 20 græn svæði og leikvellir borgarinnar verði teknir í gegn í sumar og boðnir borgarbúum til umhirðu. Sérstaklega verði hugað að þörfum ömmu og afa á leiksvæðunum.

Sjálfbært gegnsæi

• Vefurinn Betri Reykjavík, www.betrireykjavik.is, verði nýttur til stuðnings við ákvarðanir og stefnumótun.
• Opnað verði vefsvæði fyrir ábendingar almennings um aðkallandi viðhald og viðgerðir í borginni.
• Dagbók borgarstjóra verði opin og aðgengileg á netinu.

Traustatök

• Fagleg rekstrarúttekt verði gerð á Orkuveitu Reykjavíkur.
• Nefndum borgarinnar verði fækkað til að auka skilvirkni og spara nefndarlaun.
• Langtímaáætlun um fjármál, framkvæmdir, borgarþróun og atvinnumál Reykjavíkur liggi fyrir í lok árs.

Allskonar

• Skólar geti áunnið sér sérstakan menningarfána með því að setja sér menningarstefnu og t.d. taka listamenn í fóstur.
• Efnt verði til kvennakvölds í Reykjavík.
• Reykjavíkurborg styðji við nýtt heimili kvikmyndanna í Regnboganum.
• Borgarstjóri verði kjörinn stjórnarformaður Fjölskyldu- og húsdýragarðsins.

Nicolai: Bæði Reykjavík og Árósar þurfa að takast á við afleiðingar efnahagskreppunnar sem nú geisar víða um heim. Við Dagur tilheyrum báðir nýrri kynslóð jafnaðarmanna sem sækir í sögu og reynslu jafnaðarmannahreyfingarinnar. Sú saga sýnir hvernig best er að byggja samfélög upp eftir kreppu, koma vinnufúsum höndum til verka, vinna að jöfnuði og koma í veg fyrir misskiptingu.
Ég er ákaflega hrifinn af því hvernig Samfylkingin tekur á atvinnumálunum og mér sýnast forystumenn hennar í Reykjavík vera með afar ábyrga og skynsama stefnu um að slá á atvinnuleysið.

Dagur: Við verðum fyrir alla muni að horfast í augu við það að hvert prósent í atvinnuleysi kostar okkur milljarð, og hann þurfa borgaryfirvöld einhvers staðar að fá. Við náum ekki tökum á velferðarmálunum, skólamálunum og öllum þessum mikilvægu borgarmálum ef okkur tekst ekki að vinna bug á vaxandi atvinnuleysi og verkefnaskorti. Þess vegna leggjum við svona mikið upp úr atvinnumálunum í þessum kosningum.

Nicolai: Margt við ástandið nú í Reykjavík er svipað því sem við stóðum frammi fyrir í Árósum þegar við byrjuðum að berjast í gegnum afleiðingar kreppunnar. Okkur hefur tekist að ná sýnilegum árangri, umfram aðrar borgir á Norðurlöndum. Við höfum náð atvinnuleysinu niður í 3,6 prósent. Það er verulegur árangur því venjulega hefur það verið svo að þegar atvinnuleysi er mikið í Danmörku, þá er það meira í Árósum en víðast annars staðar í landinu. Nú er það öfugt, við erum töluvert undir meðaltalinu.

Dagur: En hvað var það nákvæmlega sem þið gerðuð – og hvernig getum við hér lært af því?

Nicolai: Það sem við gerðum var að setja af stað atvinnuáætlun um að flýta fjárfestingum sem til stóð að fara í seinna. Við lögðum áherslu á að fjárfesta í uppbyggingarverkefnum fyrir skóla og leikskóla og öldrunarheimili. Við litum þannig á að það væri ekki hægt að bíða eftir því að aðrir tækju við sér, borgin yrði að vakna og setja af stað átak í framkvæmdum. Þessar aðgerðir höfðu svo strax áhrif við að koma fólki til starfa og komu í veg fyrir að við þyrftum að skera eins mikið niður og ella hefði orðið. Þessar aðgerðir unnu því með okkur á öllum sviðum.

Dagur: Mér finnst þetta mjög áhugavert, því þetta er nákvæmlega það sem við höfum verið að tala um hér í borginni fyrir daufum eyrum meirihlutans. Reykjavík verður að takast á við vandamálið með því að hætta afskiptaleysinu. Doði gengur ekki gegn atvinnuleysi. Borgin verður að byrja, taka forystu og hrinda af stað áætlun um að ná niður atvinnuleysinu og koma hjólum atvinnulífsins af stað. Frjálshyggjuhugmyndir um að best sé að bíða eftir því að markaðurinn taki við sér ganga einfaldlega ekki upp í kreppu.

Nicolai: Við ákváðum að horfa sérstaklega á atvinnuleysi meðal ungs fólks og takast á við það, því við gátum ekki sætt okkur við að til yrðu heilar kynslóðir atvinnulausra, sem síðan legði enn þyngri byrðar á velferðarkerfið. Við megum ekki við því að tapa ungu kynslóðinni.

Dagur: Það versta sem hægt er að gera við þessar aðstæður er að vera aðgerðalaus og vona það besta. Allir verða að leggja afar hart að sér og að mínu viti er ekkert betra ráð en það sem jafnaðarmenn hafa lagt áherslu á alla tíð um vinnu, velferð og jöfn tækifæri.

Nicolai: Þið eruð ekki eina þjóðin eða fyrsta þjóðin sem gengur í gegnum kreppu og það hefur ýmislegt verið reynt. Við sáum í kreppunni miklu í Bandaríkjunum að Hoover forseti Repúblikana ætlaði að sitja hjá og bíða eftir því að markaðsöflin kæmust á lappirnar. Þeir voru ekki vanir þeirri hugsun að ríkið eða sveitarstjórnirnar ættu að taka frumkvæði til að koma atvinnulífinu af stað. Þetta gekk ekki upp hjá Repúblikönum í Ameríku og þetta á ekki eftir að virka hjá frjálshyggjufólkinu á Íslandi. Mér finnst margt benda til þess að hægri vængurinn hafi ekki lært neitt.

Dagur: Við þurfum fjárfestingu í atvinnumálin, samvinnu við alla þá sem geta unnið með okkur við að skapa störf og takast á við atvinnuleysið. Mér finnst mikilvægt að fólk átti sig á því þegar kemur að því að greiða atkvæði að mikilvægasta verkefnið er að tryggja atvinnu, koma hjólunum af stað. Ef okkur tekst það ekki þá þarf að skera miklu meira niður, þá kemst enginn hjá því að taka á sig meiri byrðar.

Nicolai: Ég er algjörlega sammála. Það þarf að sýna borgurunum að tilteknar aðferðir hafa virkað til að koma á atvinnu eftir kreppu. Þessar hugmyndir sem Samfylkingin hefur verið að vinna með eru ekki bara hugmyndir heldur lausnir sem hafa virkað. Þær hafa virkað í borg eins og minni. Ég er þar af leiðandi algerlega sannfærður um að áætlunin um að fjárfesta í atvinnuverkefnum er rétta lyfið við þeim meinum sem Reykvíkingar kljást við núna.
Dagur: Ef við tökumst ekki á við atvinnuleysið er minna til fyrir skólana, leikskólana, öldrunarheimilin. Efnahagurinn verður veikari og þá eru það hinir verst settu sem þurfa að borga mest. Breytingar verða að eiga sér stað svo börn, láglaunafólk og aldraðir verði ekki útundan í kreppunni.

Nicolai: Atvinnumálin eru lykillinn að öllu hinu sem þarf að gera. Annars er velferð borgaranna í hættu. Við ákváðum að einbeita okkur að grænum vexti, laða til okkar fyrirtæki í grænum iðnaði, við viljum að Árósar verði vindorkuhöfuðborg heimsins. Hvernig gerum við það? Spurðum við. Jú, við byrjuðum á að laða til okkar fremstu fyrirtækin í grænum iðnaði og náðum þeim árangri að stærsti vindmylluframleiðandi í heimi, Vestas, ætlar að setja upp sínar höfuðstöðvar í Árósum á næsta ári. Ég sé ekki annað en Reykjavík gæti stefnt að góðum árangri á sama sviði, verða græn höfuðborg. Þess vegna líst mér vel á áætlanirnar sem Samfylkingin hefur verið með um grænan vöxt í borginni.

Dagur: Við erum ekki eins vel sett og Árósar voru þegar kreppan skall á, því þeir höfðu fé til að setja í fjárfestingarverkefni sem við eigum ekki til. Samt tel ég að við verðum að feta í þeirra fótspor. Við verðum þá að taka eins hagstætt lán og við getum til að koma hlutunum af stað. Það er ráð sem hefur virkað gegn kreppu og við búum við það að borgarsjóður sjálfur stendur þokkalega og ræður við að taka lán til framkvæmda.

Nicolai: Við sjáum alveg að það er við alvarlegan vanda að glíma og erfið vandamál kalla á alvarlegar lausnir. Þess vegna er ekki nóg að benda bara á það sem er að, heldur verður að takast á við verkefnin af hörku og dugnaði. Raunverulegt innihald og alvöru lausnir er það sem þarf. Ef þessu er slegið upp í kæruleysi eða grín er hætt við að brosið endist ekki lengi eftir að kjördegi lýkur.

Það þarf nýja hugsun í Ráðhúsið. Borgin verður að vakna, taka forystu og beita öllu afli til að skapa störf og fjölga tækifærum. Kjarninn í hinni nýju hugsun er að Reykjavíkurborg þarf að beita sér og kveikja von til að koma Íslandi út úr kreppunni.

Borgin býr yfir sterkum innviðum og miklum mannauði en hlutverk hennar þarf að endurhugsa, eins og svo margt annað, eftir hrun. Það hefur Samfylkingin gert og kynnir aðgerðir á öllum lykilsviðum með megináherslu á atvinnumál, jöfn tækifæri og öruggt umhverfi barna.

Samfylkingin vill binda endi á aðgerðaleysið og hrinda markvissum og mikilvægum aðgerðum í framkvæmd í atvinnumálunum:

1. Tvöföldun viðhalds og auknar verklegar framkvæmdir
2. Endurnýjun í eldri hverfum og efling innviða
3. Samstillt vaxtarátak á öllu höfuðborgarsvæðinu
4. Átak í nýsköpun og nýtingu á tómu húsnæði
5. Vaxtarátak í græna geiranum

Samfylkingin vill aukið samstarf á höfuðborgarsvæðinu sem er eitt búsetu- og atvinnusvæði til að tryggja heildaryfirsýn og koma í veg fyrir kostnaðarsamt lóðakapphlaup og sóun á fjármunum útsvarsgreiðenda. Vítin eru til að varast þau.

Samfylkingin vill tryggja öllum börnum örugga þjónustu, standa vörð um grunn- og leikskóla og tryggja ódýrari frístundir fyrir öll börn, óháð efnahag. Að öðrum kosti er veruleg hætta á að hópar fólks, heilu kynslóðirnar beri varanlegan skaða af efnahagskreppunni.

Samfylkingin hafnar öllum hugmyndum um einkavæðingu Orkuveitunnar og leggur áherslu á að unnið verði á skuldavanda fyrirtækisins án tafar en skuldirnar hafa fjórfaldast á kjörtímabilinu sem er að ljúka.

Borgarmálin hafa verið í kreppu allt kjörtímabilið. Það er lykilatriði að endurvekja traust á borgarstjórn. Það verður aðeins gert með markvissum umbótum.

Auk ofangreindra áhersluatriða leggur Samfylkingin fram heildstæða stefnuskrá í öllum málaflokkum sem byggir á ítarlegri stefnumótun og samráði við á annað þúsund Reykjavíkinga og Samfylkingarfólk í vetur. Hægt er nálgast alla málaflokka á heimasíðunni undir Málefni.

Baráttan fyrir atvinnu er hornsteinn jafnaðarstefnunnar og forgangsmál við núverandi aðstæður. Öflugt og fjölbreytt atvinnulíf er alls staðar undirstaða velferðar og því lítur Samfylkingin á það sem eitt mikilvægasta hlutverk borgarinnar að efla og styrkja atvinnulífið í borginni. Upp á það hefur mikið skort síðustu ár.

Lykiláherslur Samfylkingarinnar í atvinnumálum og aðgerðum gegn atvinnuleysi eru:

• Nýsköpun, framtíðarsýn og samstarf
• Vaxtarsamningur Reykjavíkur og nágrennis
• Viðhald og verklegar framkvæmdir
• Grænn vöxtur
• Evrópska leiðin í fjármögnun á endurnýjun hverfa og fjárfestingu í innviðum

1.         Nýsköpun, framtíðarsýn og samstarf í atvinnumálum

Fyrsta verk Samfylkingarinnar við stjórn borgarinnar verður að efna til funda með samtökum í atvinnulífi og fulltrúum fyrirtækja og stofnana til að skilgreina stöðu, styrkleika og sóknarfæri atvinnulífs Reykjavíkurborgar til skamms og langs tíma. Samfylkingin flutti tillögu sama efnis þremur vikum eftir hrun en hún hefur verið í frestun að hálfu meirihlutans allar götur síðan. Meðal áherslusviða verkefnisins og sóknarfæra sem horft verður til verði:

1. Ferðamannaborgin Reykjavík
2. Hafnarborgin Reykjavík
3. Heilsuborgin Reykjavík
4. Hönnunarborgin Reykjavík
5. Kvikmyndaborgin Reykjavík
6. Menningarborgin Reykjavík
7. Orkuborgin Reykjavík
8. Skólaborgin Reykjavík
9. Tónlistarborgin Reykjavík
10. Verslunarborgin Reykjavík
11. Þekkingarborgin Reykjavík (nýsköpun, rannsóknir og þróun)
12. Þjónustuborgin Reykjavík

Samfylkingin vill:

Endurreisa, þróunar- og nýsköpunarfélag Reykjavíkurborgar í atvinnumálum. Það verði vettvangur samstarfs opinberra og einkaaðila um að laða fjárfestingu til borgarinnar, nýta sóknarfæri í atvinnumálum og leita leiða við að leiðbeina og auðvelda einstaklingum að stofna og reka fyrirtæki í Reykjavík. Meðal nýrra áherslusviða verði verkefni á sviði þekkingariðnaðar, kvikmyndagerðar og annarra skapandi greina.

Höfuðborgarstofa, viðburða- og markaðsskrifstofa Reykjavíkurborgar í ferðaþjónustu verði opnuð fyrir aðkomu, fjármagni og nánara samstarfi við ferðaþjónustufyrirtæki í Reykjavík. Sérstaklega verði kannaður grundvöllur til að fjölga viðburðum sem styðja við markaðssetningu Reykjavíkur gagnvart ferðamönnum utan háannatíma.

Átak verði gert til að kynna ráðstefnuborgina Reykjavík, ekki síst í tilefni af opnun Tónlistar- og ráðstefnhússins, Hörpunnar. Menning sem aflvaki atvinnulífsins fái verðugan sess í atvinnustefnu Reykjavíkur.

Kanna möguleika á eflingu alþjóðlegrar kvikmyndahátíðar og aðkomu Reykjavíkurborgar að samstarfi um rekstur kvikmyndahúss í miðborginni sem myndi helga sig sögu og sýningum á íslenskum kvikmyndum. Kanna fýsileika og sóknarfæri fyrir úthlutun lóðar fyrir alhliða kvikmyndaver í borgarlandinu.

Reykjavíkurborg skipi sér aftur í forystu í rafrænni stjórnsýslu og þjónustu.

Stutt verði við uppbyggingu þekkingar- og heilbrigðistengdra fyrirtækja með samstarfi um beina markaðssetningu á háskólasvæðum í Vatnsmýri í samvinnu við Háskóla Íslands, Háskólann í Reykjavík og Landsspítalann. Reykjavíkurborg greiði fyrir skipulagi stúdentaíbúða og annarra innviða sem stuðla að sömu markmiðum.

Styðja við nýsköpunarsetur, sprota-hótel og/eða listasmiðjur. Í því skyni verði kortlagt hvaða tækifæri geti falist í auðu og óseldu húsnæði víðs vegar um borgina, umfang þess og staðsetningu. Þá verði útfærðar leiðir til að tryggja notkun á auðu húsnæði og laða að smærri fyrirtæki inn í hverfi borgarinnar.

Einfalda leyfisveitingar og umsóknarferli fyrir þá sem vilja stofna til reksturs í Reykjavíkurborg. Þeim standi jafnframt til boða leiðsögn og aðstoð við öflun nauðsynlegra leyfa til reksturs sér að kostnaðarlausu.

2.         Vaxtarsamningur Reykjavíkur og nágrennis  - markviss efling alls atvinnulífs

Til að standa undir velferð og lífskjörum þarf að tryggja 3,5% meðalhagvöxt í Reykjavík næsta kjörtímabil. Vegna stöðu efnhagsmála þýðir þetta jafnframt að stefna þarf að um 5% hagvexti 2014. Til þess þarf margþættar aðgerðir sem ekki eru allar á færi Reykjavíkur heldur þarf að ná víðtækari samstöðu og samstarfi. Þessi tölulegu markmið eiga að vera markmið vaxtarsamnings Reykjavíkur, ríkisstjórnar, verkalýðshreyfingar, fyrirtækja, stuðningsstofnana atvinnulífsins og  annarra samtaka í atvinnulífi.

Höfuðborgarsvæðið er eitt atvinnusvæði og á í samkeppni við erlendar borgir um fólk og verðmæt fyrirtæki. Það er kominn tími til að sveitarfélög á höfuðborgarsvæðinu snúi bökum saman og styrki það sem valkost þegar kemur að búsetu og fyrirtækjarekstri.

Samfylkingin vill:

Að Reykjavíkurborg bjóði nágrannasveitarfélögum, ríkisstjórn, menntastofnunum og aðilum vinnumarkaðar til samstarfs um vaxtarsamning atvinnulífs á höfuðborgarsvæðinu.

Meginmarkmið samningsins yrðu að styrkja samkeppnishæfni fyrirtækja í virkri alþjóðlegri samkeppni, auka veltu, verðmætasköpun, útflutningstekjur og skapa þannig grunn fyrir umtalsverða fjölgun starfa á næstu misserum.

Að áherslur vaxtarsamningsins um nýsköpun nái til atvinnulífsins alls, jafnt fyrirtækja í hefðbundnum iðnaði og þjónustu sem byggja á gömlum grunni sem nýrra hátækni- og sprotafyrirtækja.

Leggja sérstaka rækt við þær greinar atvinnulífs í borginni sem skilað geta vexti á ábyrgan hátt á næstu misserum, s.s. ferðaþjónusta, upplýsingatækni, kvikmyndagerð, hönnun og aðrar skapandi greinar.

Stofnuð verði fjárfestingar- og atvinnumálastofa Reykjavíkurborgar sem fjárfestar og atvinnurekendur geta leitað til þegar þeir vilja byggja upp rekstur.

Að þróunar- og nýsköpunarfélag Reykjavíkurborgar í atvinnumálum kynni borgina með virkum hætti fyrir innlendum og erlendum fyrirtækjum í vexti. Leitað verði bestu erlendu fyrirmynda við útfærlu vaxtarsamningsins.

Vaxtarsamningur er formlegt samstarf sveitastjórna, ríkisvalds, aðila í atvinnulífinu og stuðningsstofnana um markvissar aðgerðir til að flýta fyrir vexti og framþróun hjá fyrirtækjum. Þessi leið hefur um árabil gefist vel í nágrannalöndum okkar, t.d. í Finnlandi, Svíþjóð, Danmörku og Bretlandi og er ein af lykilaðgerðum Evrópusambandsins við svæðisbundna eflingu byggða og atvinnulífs.

Náinni samvinnu fyrirtækja, þekkingarstofnana og fjárfestingaraðila er komið á, fyrirtæki í sama geira mynda klasa, skiptast á upplýsingum og vinna saman að sameiginlegum markmiðum s.s. markaðssetningu og að hækka þekkingar- og tæknistig. Dæmi um beinar aðgerðir er stuðningur við fyrirtæki sem vilja ráða rekstrarráðgjafa til að yfirfara ferla innan fyrirtæksins og auka skilvirkni og framlegð.

3.         Viðhald og verklegar framkvæmdir

Samfylkingin í Reykjavík vill þegar í stað bregðast við atvinnuleysi með forgangsröðun verkefna eftir því hve mörg störf þau skapa hjá hópum þar sem atvinnuleysi er mest. Samfylkingin í Reykjavík vill bjóða öðrum sveitarfélögum á höfuðborgarsvæðinu samstarf um aðgerðir gegn atvinnuleysi enda um eitt atvinnusvæði að ræða.

Samfylkingin vill:

Taka lán til að halda uppi framkvæmdastigi í kreppunni í stað þess að skera framkvæmdir niður um 70% eins og nú er ráðgert. Borgarsjóður ræður við þessar lántökur, hægt er að fá hagstæð tilboð og forða þannig algeru hruni í framkvæmda- og byggingariðnaði.

Tvöfalda viðhald á fasteignum borgarinnar árin 2011-2012 með því að flýta brýnum viðhaldsverkefnum sem annars hefðu komið til framkvæmda 2013-2015. Þannig skapast störf þegar mest þarf á þeim að halda.

Tryggja að borgin kaupi ávallt vinnu af viðurkenndum fagaðilum og girt sé fyrir undirboð kennitöluflakkara.

Setja fram heildstæða áætlun fyrir endurnýjun eldri hverfa að evrópskri fyrirmynd. Í stað þess að hverfin drabbist niður í kreppunni verði efnt til tímabærs viðhalds og endurnýjunar á húsum og opinberum byggingum, auk endurnýjunnar borgarumhverfis og útisvæða. Byrjað verði í Breiðholti.

Auka fjármagn til hreinsunar borgarlandsins, stígagerðar og uppbyggingar grænna svæða til að skapa fleiri sumarstörf fyrir námsmenn og ungt fólk.

Auðvelda breytingar á íbúðarhúsnæði sem bæta aðgengi fatlaðra og aldraðra og gera þeim kleift að búa lengur heima, með breytingum á íbúðum og gerð lyftuhúsa í fjölbýlishúsum. Þannig verði aukin eftirspurn eftir hönnuðum, arkitektum og iðnaðarmönnum.

Að eigendur niðurníddra húsa í borginni verði skikkaðir til að koma þeim í viðunandi horf en dagsektum beitt ef frestir eru ekki virtir. Borgin láti standsetja húsin á kostnað eigenda ef ekki er brugðist við aðgerðum borgarinnar.

Auka samstarf við Vinnumálastofnun um starfsþjálfunarsamninga, sérstök tímabundin átaksverkefni og ,,Starfsorku“ sem býður fullar atvinnuleysisbætur með hverjum starfsmanni á atvinnuleysisskrá í allt að eitt ár þegar ráðist er í nýsköpunarverkefni eða markaðssetningu erlendis.

4.         Grænn vöxtur í Reykjavík

Stöðugur vöxtur atvinnulífs í borginni til lengri tíma er best tryggður með atvinnustefnu sem byggir á styrkleikum borgarinnar í sátt við  umhverfið og umhyggju fyrir rétti komandi kynslóða.

Samfylkingin vill:

Móta orku- og auðlindastefnu þar sem áhersla er lögð á jafnrétti kynslóða, hámörkun langtímaávinnings og grænt orðspor borgarinnar.

Könnuð verði tækifæri til uppsetningar iðnaðar- og orkugarða t.d. á nýju atvinnusvæði á Hólmsheiði þar sem í boði verði orka á hagstæðu verði til starfsemi í græna hagkerfinu og þar sem sérstök áhersla verður lögð á að gera sem best í umhverfismálum framleiðslu- og iðnfyrirtækja.

Að innan áratugar verði annar hver bíll í Reykjavík knúinn innlendri, vistvænni orku. Borgin beiti sér fyrir markvissu átaki í samvinnu og samráði við löggjafa- og framkvæmdavald, nágrannasveitarfélög, fyrirtæki, frjáls félagasamtök og aðra þá aðila sem hjálpað geta til við að ná þessu markmiði.

Að borgin setji gott fordæmi með því að setja stofnunum og fyrirtækjum borgarinnar metnaðarfulla umhverfisstefnu með mælanlegum markmiðum. Jafnframt hvetji borgin einkafyrirtæki til þess sama, m.a. með viðurkenningum og hagrænum hvötum.

Styrkja nafn Reykjavíkur sem miðstöð í rannsóknum á jarðhita, endurnýtanlegum orkugjöfum og sjávarútvegi. Atvinna Reykvíkinga til framtíðar hvílir á skynsamlegri og hugvitssamlegri nýtingu auðlinda. Það ætti ekki að fara fram hjá neinum sem býr í eða heimsækir Reykjavík hve mikilvægar þessar auðlindir eru.

Grænn vöxtur felur m.a. í sér að horft verði til samfélagslegra áhrifa af nýtingu orkuauðlinda borgarinnar en ekki einungis einblínt á virkjunarþáttinn. Stefna þarf að aukinni fjölbreytni í orkusölu, að sem flest störf og mestur virðisauki skapist af virkjun orkunnar, að tæknistig- og þekking aukist og arðsemi til lengri tíma verði sem mest.

Reykjavík getur boðið upp á góð vaxtarskilyrði fyrir grænan iðnað með því að hlúa að mennta-, rannsóknar- og menningarstofnunum og samstarfi þeirra við atvinnulífið. Með metnaðarfullum markmiðum, svo sem um orkuskipti í samgöngum, getur Reykjavíkurborg lagt grunn að alþjóðlegum þróunarverkefnum á sviði græns iðnaðar.

Ýmis tækifæri hafa orðið til í nýsköpunargreinum sem hjálpa okkur að lifa í betri sátt við umhverfið. Áherslan á uppbyggingu atvinnuvega í sátt við umhverfið er alþjóðlegt fyrirbæri sem ekki einu sinni fjármálakreppan hefur bitið á. Þann geira köllum við græna hagkerfið. Þar er vaxtarbroddur sem vert er að sækja í.

5.         Evrópska leiðin

- fjármögnun á endurnýjun eldri hverfa, endurlán til lítilla og meðalstórra fyrirtækja og fjárfestingar í grænum samgöngum, innviðum og grænni orku

Samfylkingin vill að Reykjavíkurborg nýti þau tækifæri sem felast í stöðu Íslands sem umsóknarríkis að ESB. Samfylkingin hefur látið taka saman stutt yfirlit yfir samfélags- og uppbyggingasjóði Evrópusambandsins með sérstakri áherslu á borgarsvæði og fjármögnunarmöguleika þeirra. Möguleikar Reykjavíkurborgar eru miklir ef rétt er á málum haldið.

Samstarf við evrópskar fjármálastofnanir og samstarfsáætlanir gætu nýst Reykjavík og sveitarfélögum á höfuðborgarsvæðinu m.a. við:

1. endurskipulagningu á skuldum sveitarfélaga og fyrirtækja þeirra
2. fjármögnun á endurnýjun eldri hverfa og atvinnusvæða
3. fjárfestingar í grænni orku, orkuskiptum í samgöngum, hjóla- og göngustígakerfi og öðrum fjárfestingum í innviðum og umhverfismálum
4. uppbyggingu vísinda- og þekkingarklasa, t.d. á háskólasvæðum
5. endurlánum til lítilla og meðalstórra fyrirtækja

ÍTAREFNI

Uppbyggingarsjóðir ESB og aðrar fjármögnunarleiðir fyrir borgasvæði (Urban areas)

Uppbyggingarsjóðir ESB eru tveir (fyrir vestur Evrópu).  Áhersla lögð á styrkja samkeppni og byggja upp atvinnulíf (ekki forgangsröðun á fjárfestingu í mannvirkjum):

Svæðaþróunarsjóðurinn (ERDF = European Regional Development Fund)

Félagsmálasjóðurinn (ESF = European Social Fund)

Leiðir til að fjármagna mannvirki, innviði og uppbyggingu smáfyrirtækja á borgasvæðum – lykillánastofnanir:

Evrópski fjárfestingabankinn (EIB = European Investment Bank).

Veitir lán til fyrirtækja og verkefna á vegum hins opinbera sem falla að stefnu og áherslum ESB. Hefur verið lykilsamstarfsaðili Orkuveitu Reykjavíkur í jarðvarmavirkjunum. Aðildarviðræður gefa tækifæri til að dýpka samstarfið og láta það ná til endurskipulagningu skulda Orkuveitunnar og fjármögnun frekari framkvæmda fyrirtækisins.

Evrópski fjárfestingasjóðurinn (EIF = European Investment Fund).

Lánar og veitir áhættufjármagn til nýrra “smáfyrirtækja” (e.SMEs).  Ekki bein fjármögnun til fyrirtækjanna heldur um að ræða aðkomu að þróunarsjóðum/verkefnum í aðildarríkjum sem byggja á skýrri stefnu (sóknaráætlunum) borgasvæða.

Ýmsar stofnanir og áætlanir ESB eru notaðar til að tryggja markvissa nýtingu fjármuna evrópskra lánastofnana á borgasvæðum:

JASPERS. Veitir tæknilega aðstoð við undirbúning á stærri fjárfestingarverkefnum. Vinnur með EIB.

JESSICA. Veitir yfirvöldum ráðgjöf við uppbyggingu borgasvæða og greiðir fyrir aðkomu lánastofnana. Tengir saman styrki úr uppbyggingarsjóðum og lán frá EIB.

JEREMIE. Greiðir fyrir því að settir eru upp fjárfestingarsjóðir á afmörkuðum svæðum fyrir lítil fyrirtæki með hlutafjárþátttöku og lánatryggingum. Vinnur með EIF.

JASMINE. Veitir aðstoð við að koma á fjármögnun smærri verkefna. Vinnur með EIF.

Ýmsar fagáætlanir ESB eru nýttar sem farvegir fyrir fé og til að mynda tengslanet og leita fyrirmynda að velheppnuðum verkefnum:

Urbacht. Borgaáætlun – samstarfsnet borga innan ESB – ýmis fjölbreytt verkefni (sjá síðar).

Interregional. Byggðaáætlanir.  Mörg fjölbreytt verkefni geta opnast (sjá síðar).

CIP. Samkeppnis- og nýsköpunaráætlunin.  Veitir ríkulega styrki til fyrirtækja og stofnana.

Menningaráætlun. Styrkir m.a. menningarhátíðir og viðburði.

Rammaáætlun ESB. Einn angi áætlunarinnar styrkir sérstaklega svæði sem vilja leggja áherslu á rannsóknir og vísindaklasa.

Dæmi um aðgerðaráætlanir nokkurra aðildarríkja sem hlotið hafa fjármagn úr svæðaþróunarsjóðum (borgasvæði).

Danmörk

Almenn áhersla á að nýta fjármuni til að þjálfa fólk til að takast á við nýja tegund af störfum.  Styrkja stjórnendaþjálfun, auka tengsl milli vísinda- og atvinnulífs o.m.fl.  Landinu skipt í sóknarsvæði, þ.m.t höfuðborgarsvæði.

Finnland

Áhersla á að byggja upp öflugt borgarsvæði á Stór-Helsinki svæðinu. Klasar sem hafa víðar alþjóðlegar tengingar, nýsköpun og þróun.

Írland

Vistvæn borgaþróun, nýsköpun og þekkingariðnaður.  Áhersla á flugvelli og hafnir sem tengja Írland við Evrópu og lykilsvæði innan landsins.

Bretland

Sérstök aðgerðaráætlun fyrir London. Áhersla á nýsköpun og rannsóknir í atvinnulífinu, aðgang að fjármagni (fyrir lítil og meðalstór fyrirtæki) og að byggja upp borgahluta fyrir atvinnulíf á sjálfbærum grunni.

Nokkur dæmi um verkefni sem EIB hefur lánað til á undanförnum árum (beinar lánveitingar, í gegnum sérstaka (borga)þróunarsjóði og t.d. lánasjóði sveitarfélaga).  Lán frá EIB eru alltaf háð því að verkefnið falli að áherslum ESB og aðgerðaráætlun viðkomandi ríkis/héraðs (National Strategic Reference Framework og Operational Plans):

Danmörk

Lán til einkafyrirtækis (Vestas Windpower Technology) til að hanna, þróa og hefja framleiðslu á vindmyllum.

Lán til Rinkjöping Landbobank til að endurlána smáfyrirtækjum.

Lán til Alfa Laval til orkuverkefnis í tveimur bæjum í Danmörku og Svíþjóð.

Lán til einkafyrirtækis um þróun ensíma.

Lán til Aarhus borgar til að reisa sorpbrennslu og ganga frá fráveitu.

Finnland

Lán til Nokia til að þróa Smartphone.

Lán til vöruþróunar í pappírsiðnaði.

Lán til einkafyrirtækis til að þróa nýtingu og flutning á gasi í Póllandi í samstarfi við Svía.

Lán til nokkurra banka til að endurlána smáfyrirtækjum.

Lán til sveitarfélagsins Vantaa til að endurbæta ýmsar byggingar í eigu þess.

Lán til meiriháttar hafnargerðar í Vousaari skammt frá Helsinki.

Lán til byggingar sjúkrahúss á Uusimaa skammt frá Helsinki (hluti af stóru heilsutengdu verkefni).

Lán til að stækka og endurbæta alþjóðaflugvöllinn í Helsinki-Vaantaa.

Írland

Lán til Lánasjóðs sveitarfélaga sem mun endurlána til skilgreindra verkefna s.s. endurnýjun borgasvæða, umhverfisverkefna og uppbyggingu ferðaþjónustu.

Lán til endurnýjunar á alþjóðaflugvellinum í Dublin (hluti af TEN vegakerfi ESB).

Lán til Trinity College til að byggja nýja álmu sem á að hýsa nýtt rannsókna- og þjálfunarsetur í biomedical fields.

Lán til framkvæmda á M50 hraðbrautinni í kringum Dublin (bypass) (hluti af TEN vegakerfi ESB).

Ýmislegt

Lán til héraðsstjórnar Katalóníu á Spáni til ýmissa borgasvæða-verkefna, samgöngubóta, umhverfis- og menntunarverkefna.

Lán til uppbyggingar þriggja háskólasjúkrahúsa á norðvestur Spáni.

Lán til uppbyggingar á gámahöfn í Barcelona og til að byggja upp öflugar vegtengingar við höfnina.

Lán til að stækka tvo flugvelli á Kanaríeyjum.

Lán til að fara í ýmis lítil og meðalstór verkefni í Barcelona (urban regeneration s.s. samgöngubætur, endurnýjun á veitukerfi o.fl.).

Lán til að stækka höfnina í Las Palmas.

Lán til að endurbæta hraðbrautina á milli Glasgow og Sterling í Skotlandi sem er hluti af samgönguáætlun landsins til 2021.

Nokkur dæmi um JESSICA, JEREMIE o.fl.

Í lok síðasta árs (2009) var stofnaður, fyrir tilstuðlan JESSICA, sk. borgaþróunarsjóður í norðvestur Englandi. Peningar í sjóðinn koma frá uppbyggingarsjóðum ESB og EIB og mun hinn síðarnefndi halda utan um sjóðinn.  Í þennan sjóð geta sótt þær borgir á svæðinu sem vilja fara í vistvæn uppbyggingarverkefni. Sjóðurinn mun veita lán, eiginfjármagn og ábyrgðir.  Meðal verkefna sem verða styrk/lánshæf eru uppbygging á nýjum atvinnusvæðum, endurgerð niðurníddra svæða o.fl.  Markmiðið er að styrkja samkeppnishæfni svæðisins og skapa 15.000 störf á næstu fjórum árum.

Þróunarskrifstofa London borgar er að undirbúa stofnun JESSICA borgarþróunarsjóðs.

Svæðisráð á þremur svæðum í Bretlandi eru að undirbúa stofnun JEREMIE sjóðs.

Stjórnvöld í Skotlandi eru að undirbúa stofnun JEREMIE sjóðs í landinu.

Nokkur dæmi um Urbact verkefni sem nú eru í gangi (borgaryfirvöld nota hluta af styrkjum úr uppbyggingarsjóðunum til að vinna að þessum verkefnum og tengjast öðrum borgum til að þróa þau.  Þurfa að falla að áherslum ESB og aðgerðaráætlunum viðkomandi ríkis/héraðs):

Samstarfsverkefni nokkurra borga þar sem unnið er að áætlunum um verndun og samkeppnishæfni gamalla miðborga (preservation of cultural heritage and strengthen their competitiveness and attractiveness).

Þróun samstarfsnets um skapandi klasa (creative clusters) í borgum í Finnlandi, Bretlandi, Portúgal, Ítalíu og víðar.

Samstarfsverkefni þriggja borga í Bretlandi, Svíþjóð og á Spáni (100 – 200 þús íbúar) þar sem borgaryfirvöld vinna með háskólum að því að styrkja samkeppnishæfni borganna. Þekking og nýsköpun (skv. Lissabon áætluninni).

Samstarfsverkefni borga í Þýskalandi (Magdeburg), Austurríki (Vín), Bretlandi (Newcastle), Danmörk (Aarhus) og víðar sem miða að því að þróa og byggja upp vísinda- og þekkingarsvæði.

Verkefni sem miðar að því að aðstoða borgir sem hafa byggt á einhæfri atvinnustarfsemi til meiri fjölbreytni.

Samstarfsverkefni tíu borga sem miðar að því að þróa heilsu og heilsutengd verkefni ýmiskonar.  Bætt heilsa íbúanna = betri samkeppnishæfni borganna.

Nokkur dæmi um Interreg verkefni:

Þróun á notkun Open Source hugbúnaðar í opinberri stjórnsýslu.

Bætt umhverfi (environment) í úthverfum.

Gerð grænna áætlana fyrir borgasvæði.

Gerð aðgerðaáætlana fyrir niðurnídd iðnaðarsvæði (Brownfields).

Vistvæn uppbygging hafnasvæða.

Atvinna

Reykjavík á ekki að unna sér hvíldar fyrr en atvinnuleysi er úr sögunni. Þar þarf að leiða samvinnu margra. Sá doði sem stafar frá ráðhúsinu er bein afleiðing af því að frjálshyggjan vísar ábyrgðinni annað á meðan hún bíður eftir að markaðurinn leysi málin. Það er dýrt. Afleiðingin gæti orðið langvarandi atvinnuleysi. Höfuðborgin á þvert á móti að taka frumkvæði. Tryggja að hlúð sé að tækifærum í markvissu samstarfi við atvinnulífið, hvort sem er í ferðaþjónustu, þekkingariðnaði eða kvikmyndagerð svo dæmi séu tekin. Reykjavík er í einstakri stöðu til að fá aðra með. Viðhaldsverkefnum og framkvæmdum á ekki að fresta heldur flýta eins og kostur er. Ráða á fólk af atvinnuleysisskrá til brýnna verkefna, þar sem það er hægt. Einnig þar á Reykjavík að stíga fram og leiða. Þá fylgja aðrir á eftir. Það er allt betra en atvinnuleysi.

Öryggi

Reykjavík á að tryggja öryggi. Við þurfum öll að geta treyst því að samfélagið standi með okkur ef í harðbakkann slær. Það þýðir að hækka þarf lágmarksframfærslu og styðja betur við barnafjölskyldur. Öllum verður að tryggja þak yfir höfuðið án yfirskuldsetningar. Til þess þarf leiguhúsnæði að vera öruggur kostur, viðráðanlegt og fáanlegt til lengri tíma. Öryggi barna á að vera númer eitt. Skólarnir eiga að vera griðastaður, líka í kreppu. Við eigum að standa saman um að endurskoða forgangsröðina og tryggja að börn hrekist ekki úr íþróttum eða frístundastarfi vegna erfiðra heimilisaðstæðna. Sú menntun er líka nauðsynleg til að leggja grunn að farsælli og og öruggri framtíð. Við þurfum sterkt velferðarsamfélag því það er lykillinn að öryggi fyrir alla. Við skulum ekki kjósa frá okkur öryggið.

Von

Reykjavík á þó ekki síst að kveikja og næra von um sterkari borg og betra samfélag þar sem við lærum af reynslunni. Við eigum að horfa til framtíðar þar sem lausnir koma í stað kreddu, umhyggja og nágrannasamfélag í stað eigingirni og afskiptaleysis, samhjálp í stað kapphlaups eftir innantómum gæðum og umburðarlyndi í stað dómhörku. Borgarbragurinn byggir á okkur sjálfum. Í góðri borg fer saman óttaleysi og fjölbreytni, tilhlökkun gagnvart framtíðinni, ásamt hæfilegri blöndu af íhaldssemi og forvitni fyrir hinu nýja. Reykjavík er aflið sem mun koma Íslandi út úr kreppunni.

Valið í vor

Það er enginn vafi að ef rétt verður á málum haldið í borginni munum við sjá nýjar og gamalgrónar atvinnugreinar vaxa aftur og dafna sem aldrei fyrr. Við þurfum bara að þora að taka skrefið til forystu, og standa og falla með því. Byrjum á því að hafna þriggja ára framtíðarsýn meirihlutans í Reykjavík um aðgerðarleysi í atvinnumálum, 11% atvinnuleysi og 70% niðurskurð til mannaflsfrekra verkefna. Það boðar bara landflótta. Reykjavík hefur alla burði til að gera margfalt betur ef hún beitir sér. Atvinnustefna og aðgerðaráætlun Samfylkingarinnar fyrir komandi borgarstjórnarkosningar sannar það. Þar birtist sýn um atvinnu, öryggi og von um betri framtíð. Þar liggur munurinn. Þitt er valið.

Í tillögunni er meðal annars byggt á fyrirliggjandi samgönguáætlun til fjögurra ára sem í fyrsta skipti gerir ráð fyrir framlögum úr ríkissjóði til gerð hjólreiðastíga á höfuðborgarsvæðinu, líkt og fram kemur í meðfylgjandi greinargerð.

Tillaga til borgarstjórnar

Borgarstjórn samþykkir að hafa forystu um gerð heildstæðrar hjólreiðaáætlunar fyrir höfuðborgarsvæðið í samvinnu önnur sveitarfélög og vegagerðina. Stefnt verði að því að stórefla möguleika á notkun reiðhjóla á svæðinu með gerð hjólreiðastígakerfis um allt höfuðborgarsvæðið þar sem hjólreiðar eru hugsaðar sem fullgildur samgöngumáti innan svæðisins.

Greinagerð

Í tillögu til þingsályktunar á yfirstandandi þingi um fjögurra ára samgönguáætlun fyrir árin 2009–2012 er sérstakur kafli um uppbyggingu hjólreiðastíga á höfuðborgarsvæðinu. Heimild er í vegalögum nr 80/2007, til að veita fél af samgönguáætlun til almennra hjólreiða- og göngustíga meðfram umferðarmestu þjóðvegum. Áætlun um slíkar framkvæmdir skal vinna í samráði við viðkomandi sveitarfélög og jafnframt er reiknað með að þau taki þátt í kostnaði við þær.

Hjólreiðar eru vistvænar og hagkvæmar og eiga að vera fullgildur samgöngumáti á höfuðborgasvæðinu öllu. Jákvætt er að hjólreiðaáætlun Reykjavíkurborgar skuli vera tilbúin en ekki er síður mikilvægt að um eflingu þessa samgöngumáta sé gott samstarf á milli sveitarfélaganna á höfuðborgarsvæðinu. Nú þegar vilji er til þess hjá alþingi og samgönguráðuneyti að efla þátt hjólreiða og leggja uppbyggingu hjólastígakerfis til hluta af vegafé ríkisins á Reykjavíkurborg að teygja sig yfir hreppamörk og bjóða nágrannasveitarfélögunum til samstarfs um þetta mikilvæga mál.

Alla síðustu öld var Reykjavík aflvél í efnahags- og atvinnulífi landsins. Þrátt fyrir mesta atvinnuleysi í sögu borgarinnar er engu síður rekin afskiptaleysisstefna í atvinnumálum í Ráðhúsinu. Þar er þess beðið að markaðurinn leysi úr málum. Samfylkingin vill þvert á móti að Reykjavíkurborg verði miklu virkari í atvinnumálum, beiti afli sínu og leiti allra leiða í víðtæku samstarfi til að Reykjavík og Ísland komist sem fyrst út úr kreppunni.

Nýsköpun og sóknarfæri

Samfylkingin vill styðja við nýsköpunarsetur, sprota-hótel og/eða listasmiðjur. Í því skyni verði kortlagt hvaða tækifæri geti falist í auðu og óseldu húsnæði og hvernig tryggja megi notkun þess í þágu atvinnulífsins og hverfanna.

Einfalda þarf leyfisveitingar og umsóknarferli fyrir þá sem vilja stofna til reksturs í Reykjavíkurborg. Þeim standi jafnframt til boða leiðsögn og aðstoð við öflun nauðsynlegra leyfa til reksturs sér að kostnaðarlausu. Í þessu skyni vill Samfylkingin endurreisa þróunar- og nýsköpunarfélag Reykjavíkurborgar í atvinnumálum. Meðal nýrra áherslusviða verði verkefni á sviði þekkingariðnaðar, kvikmyndagerðar og annarra skapandi greina.

Höfuðborgarstofa, viðburða- og markaðsskrifstofa Reykjavíkurborgar í ferðaþjónustu verði opnuð fyrir aðkomu, fjármagni og nánara samstarfi við ferðaþjónustufyrirtæki í Reykjavík. Sérstaklega verði kannaður grundvöllur til að fjölga viðburðum sem styðja við markaðssetningu Reykjavíkur gagnvart ferðamönnum utan háannatíma.

Kannaðir verði möguleikar á eflingu alþjóðlegrar kvikmyndahátíðar og aðkomu Reykjavíkurborgar að samstarfi um rekstur kvikmyndahúss í miðborginni sem myndi helga sig sögu og sýningum á íslenskum kvikmyndum. Kanna fýsileika og sóknarfæri fyrir úthlutun lóðar fyrir alhliða kvikmyndaver í borgarlandinu.

Samfylkingin vill einnig að stutt verði við uppbyggingu þekkingar- og heilbrigðistengdra fyrirtækja með samstarfi um beina markaðssetningu á háskólasvæðum í Vatnsmýri í samvinnu við Háskóla Íslands, Háskólann í Reykjavík og Landspítalann. Reykjavíkurborg greiði fyrir skipulagi stúdentaíbúða og annarra innviða sem stuðla að sömu markmiðum.

Viðhald og verklegar framkvæmdir

Samfylkingin telur skynsamlegt að taka lán til að halda uppi framkvæmdastigi í kreppunni í stað þess að skera framkvæmdir niður um 70% næstu þrjú ár eins og nú er ráðgert. Borgarsjóður ræður við þessar lántökur, hægt er að fá hagstæð tilboð og forða þannig algeru hruni í framkvæmda- og byggingariðnaði.

Sérstaka áherslu á að leggja á viðhaldsverkefni. Viðhald skapar flest störf og lækkar rekstrarkostnað. Samfylkingin vill tvöfalda viðhald á fasteignum borgarinnar árin 2011-2012 með því að flýta brýnum viðhaldsverkefnum sem annars hefðu komið til framkvæmda 2013-2015. Þannig skapast störf þegar mest þarf á þeim að halda.

Samfylkingin vill jafnframt setja fram heildstæða áætlun fyrir endurnýjun eldri hverfa að evrópskri fyrirmynd. Í stað þess að hverfin drabbist niður í kreppunni verði efnt til tímabærs viðhalds og endunýjunar á húsum og opinberum byggingum.

Vaxtarsamningur fyrir Reykjavík

Til að standa undir velferð og lífskjörum þarf að tryggja 3,5% meðalhagvöxt í Reykjavík næsta kjörtímabil. Til þess þarf margþættar aðgerðir sem ekki eru allar á færi Reykjavíkur heldur þarf að ná um þær víðtækri samstöðu og samstarfi. Þessi tölulegu markmið eiga að vera markmið vaxtarsamnings Reykjavíkur, ríkisstjórnar, verkalýðshreyfingar, fyrirtækja, stuðningsstofnana atvinnulífsins og annarra samtaka í atvinnulífi. Meginmarkmið hans yrðu að styrkja samkeppnishæfni fyrirtækja í virkri alþjóðlegri samkeppni, auka veltu, verðmætasköpun, útflutningstekjur og skapa þannig grunn fyrir umtalsverða fjölgun starfa á næstu misserum.

Fyrsta verk Samfylkingarinnar við stjórn borgarinnar verður að skilgreina stöðu, styrkleika og sóknarfæri atvinnulífs Reykjavíkurborgar til skamms og langs tíma. Samfylkingin flutti tillögu sama efnis þremur vikum eftir hrun en hún hefur verið í frestun af hálfu meirihlutans í Ráðhúsinu allar götur síðan. Meðal áherslusviða verkefnisins og sóknarfæra sem horft verður til verði: Ferðamannaborgin Reykjavík, hafnarborgin, heilsuborgin, kvikmyndaborgin, orkuborgin og þekkingarborgin Reykjavík. Tækifærin liggja víða ef stefnan er framsýn og verkin látin tala.

Fjölmargar fleiri tillögur og áherslur í atvinnumálum eru í atvinnustefnu Samfylkingarinnar og kosningastefnuskrá vegna komandi borgarstjórnarkosninga. Atvinnumálin eru úrslitamál í þróun efnahags- og lífsgæða í borginni á næstu árum og því mikilvægt að borgarbúar kynni sér stefnu og tillögur flokkanna í þessum málaflokki.

Birt í Fréttablaðinu í morgun, 27. apríl 2010.

Morgunblaðið fer mikinn í leiðara dagsins gegn nýjum tillögum Samfylkingarinnar í Reykjavík í atvinnumálum. Ljóst er að þær geta orðið eitt helsta hitamálið í komandi borgarstjórnarkosningum.

Samfylkingin samþykkti á Reykjavíkurþingi sínu á laugardaginn ítarlegar tillögur í atvinnumálum þar sem markið er sett á að í víðræku samstarfi verði tryggður 3,5% meðalhagvöxtur í borginnni á næsta kjörtímabili. Um þetta fjalla tillögur að vaxtarsamningi fyrir Reykjavík, nýsköpun, framtíðarsýn og samstarf.

Mest fyrir brjóstið á Morgunblaðinu fara þó tillögur um að taka tímabundin lán til að ráðast í viðhaldsverkefni og verklegar framkvæmdir. Þetta er skynsamlegt til að draga úr atvinnuleysi, nýta hagstæð verð á byggingamarkaði og þá ívilnun Alþingis að endurgreiða virðisauka á viðhaldsvinnu.

Mestu skiptir þó að árlegur kostnaður Reykjavíkurborgar við hvert prósent í atvinnuleysi kostar borgarsjóð einn milljarð króna, í tekjutapi og auknum velferðarútgjöldum. Þar ofaná bætast afleiðingar atvinnuleysis fyrir fjölskyldur og börn atvinnulausra. Samfylkingin mun aldrei sætta sig við atvinnuleysi í borginni.

Ekki þarf að koma á óvart að ritstjóri Morgunblaðsins taki sér stöðu með Hönnu Birnu og Sjálfstæðisflokknum í borginni. Þau ætla -í sönnum frjálshyggjuanda – að reyna að bíða af sér kreppuna, aðgerðarlaus í atvinnumálum. Í þriggja ára áætlun um fjármál og rekstur 2011-2014 sem kynnt var á dögunum boðaði meirihlutinn í borginni 70% niðurskurð í framkvæmdum og áframhaldandi 50% niðurskurð í eðlilegu viðhaldi. Framtíðarsýn meirihlutans birtist m.a. í því að gert er ráð fyrir 11% atvinnuleysi allt til ársins 2014 með tilheyrandi kostnaði fyrir borgarsjóð. Þetta gagnrýndi Samfylkingin harðlega í borgarstjórn og leggur nú fram tillögur og nýja sýn á atvinnumál og aðgerðir gegn atvinnuleysi. Með framkvæmd þeirra kemst Reykjavík bæði fyrr og sterkari út úr kreppunni.

Nýjar leiðir í stefnumótun – á annað þúsund Reykjavíkingar þátttakendur

Stefnuskráin hefur verið undirbúin á nýstárlegan hátt. Í haust var haldið framtíðarþing í anda þjóðfundar um grunngildi jafnaðarstefnunnar og lykilverkefnin í borgarmálunum. Frá áramótum hefur Samfylkingarfólk og fjöldi annarra Reykvíkinga svo hist á opnum stefnumótunarfundum og haldnir hafa verið um 60 heimafundir. Heimafundir eru ný leið í stjórnmálastarfi á Íslandi þar sem 15-20 einstaklingum, flokksbundnum og óflokksbundnum er boðið í heimahús og málin rædd á óformlegan – en umfram allt skemmtilegan hátt. Gríðarlegt magn ábendinga og hugmynda hafa komið fram á heimafundum Samfylkingarinnar sem nýst hafa við gerð kosningastefnuskrárinnar. Því má ætla að á annað þúsund manns hafi komið að undirbúningi kosningastefnu Samfylkingarinnar fyrir borgarstjórnarkosningarnar 29. maí 2010.

Atvinnumál verða lykilmál Samfylkingarinnar

Ítarlegasti þáttur kosningastefnuskrárinnar fjallar um atvinnustefnu og aðgerðir gegn atvinnuleysi. Samfylkingin lítur á atvinnumál sem algjört forgangsmál á næsta kjörtímabili. Áframhaldandi aðgerðarleysi núverandi meirihluta er algerlega óviðunandi. Gerð er tillaga um að sett verði hagvaxtarmarkmið fyrir næsta kjörtímabil og kallað til víðtæks samstarf til að ná þeim með gerð sérstaks Vaxtarsamnings fyrir Reykjavík.

“Til að standa undir velferð og lífskjörum þarf að tryggja 3,5% meðalhagvöxt í Reykjavík næsta kjörtímabil. Vegna stöðu efnhagsmála þýðir þetta jafnframt að stefna þarf að um 5% hagvexti 2014. Til þess þarf margþættar aðgerðir sem ekki eru allar á færi Reykjavíkur heldur þarf að ná víðtækari samstöðu og samstarfi. Þessi tölulegu markmið eiga að vera markmið vaxtarsamnings Reykjavíkur, ríkisstjórnar, verkalýðshreyfingar, fyrirtækja, stuðningsstofnana atvinnulífsins og annarra samtaka í atvinnulífi.”

Vaxtarsamningi fyrir Reykjavík er frekar lýst í atvinnustefnu Samfylkingarinnar.

Lykilþættir í atvinnustefnu Samfylkingarinnar

Í inngangi atvinnustefnunar segir: Baráttan fyrir atvinnu er hornsteinn jafnaðarstefnunnar og forgangsmál við núverandi aðstæður. Öflugt og fjölbreytt atvinnulíf er alls staðar undirstaða velferðar og því lítur Samfylkingin á það sem eitt mikilvægasta hlutverk borgarinnar að efla og styrkja atvinnulífið í borginni. Upp á það hefur mikið skort síðustu ár.

Lykiláherslur Samfylkingarinnar í atvinnumálum og aðgerðum gegn atvinnuleysi eru:

i) Nýsköpun, framtíðarsýn og samstarf

ii) Vaxtarsamningur Reykjavíkur og nágrennis

iii) Viðhald og verklegar framkvæmdir

iv) Grænn vöxtur

v) Evrópska leiðin í fjármögnun á endurnýjun hverfa og fjárfestingu í innviðum

Dæmi um stefnumál Samfylkingarinnar í atvinnumálum

Meðal stefnumála sem sett eru fram í atvinnustefnunni má nefna:

• Tvöfalda viðhald á fasteignum borgarinnar árin 2011-2012 með því að flýta brýnum viðhaldsverkefnum sem annars hefðu komið til framkvæmda 2013-2015. Þannig skapast störf þegar mest þarf á þeim að halda.
• Setja fram heildstæða áætlun fyrir endurnýjun eldri hverfa að evrópskri fyrirmynd. Í stað þess að hverfin drabbist niður í kreppunni verði efnt til tímabærs viðhalds og endunýjunar á húsum og opinberum byggingum, auk endurnýjunnar borgarumhverfis og útisvæða. Byrjað verði í Breiðholti.
• Höfuðborgarstofa, viðburða- og markaðsskrifstofa Reykjavíkurborgar í ferðaþjónustu verði opnuð fyrir aðkomu, fjármagni og nánara samstarfi við ferðaþjónustufyrirtæki í Reykjavík. Sérstaklega verði kannaður grundvöllur til að fjölga viðburðum sem styðja við markaðssetningu Reykjavíkur gagnvart ferðamönnum utan háannatíma.
• Kanna möguleika á eflingu alþjóðlegrar kvikmyndahátíðar og aðkomu Reykjavíkurborgar að samstarfi um rekstur kvikmyndahúss í miðborginni sem myndi helga sig sögu og sýningum á íslenskum kvikmyndum. Kanna fýsileika og sóknarfæri fyrir úthlutun lóðar fyrir alhliða kvikmyndaver í borgarlandinu.
• Styðja við nýsköpunarsetur, sprota-hótel og/eða listasmiðjur. Í því skyni verði kortlagt hvaða tækifæri geti falist í auðu og óseldu húsnæði víðs vegar um borgina, umfang þess og staðsetningu. Þá verði útfærðar leiðir til að tryggja notkun á auðu húsnæði og laða að smærri fyrirtæki inn í hverfi borgarinnar.
• Einfalda leyfisveitingar og umsóknarferli fyrir þá sem vilja stofna til reksturs í Reykjavíkurborg. Þeim standi jafnframt til boða leiðsögn og aðstoð við öflun nauðsynlegra leyfa til reksturs sér að kostnaðarlausu.